DILI 29 abríl 2021 (TATOLI)—Jurista Timoroan, Sérgio Quintas, louva prestasaun serbisu Prezidente Tribunál Rekursu (PTR) Deolindo dos Santos, durante mandatu tinan haat, no hein katak ho re-nomeia ba periúdu tuir-mai bele serbisu makaas liu tan atu hakbesik liu tan justisa ba povu.
“Hato’o parabens ba PTR ne’ebé re-nomeia atu kontinua serbí liu hosi-nia kargu, husu atu kontinua serbisu ho di’ak hodi lori justisa hakbesik liu-tan ba povu vunerável, liuliu kria mós tribunál primeira instánsia iha munisipiu-sira ne’ebé seidauk iha,” Sérgio Quintas hateten ba jornalista Agéncia Tatoli, iha Tribunál Distritál Dili (TDD), kinta ne’e.
Notísia relevante:Prezidente Repúblika nomea Deolindo dos Santos nu’udar PTR
Jurista Timoroan ne’e louva serbisu PTR tanba, durante ne’e hanesan mós Prezidente Konsellu Superiór Majistradu Judisiál, orienta subordinadu-sira iha TR no Tribunál primeira instánsia, hodi redúz prosesu kazu sivíl no krime pendente ho númeru makaas, no iha espetativa ba oin kontinua di’ak liu-tan.
Sérgio Quintas, sujere mós katak, durante mandatu tinan haat ba oin, PTR presija serbisu hamutuk ho Ministériu Justisa (MJ) no Prokuradór Jerál Repúblika (PJR), hodi haree ba reforma organizasaun judisiáriu, ne’ebé oras ne’e sei bazeia ba lei United Nations Transitional Administration in East Timor (UNTAET).
Ho reforma ne’e, sai sai baze atu bele estabelese lalais kona-bá Supremu Tribunál Justisa, tuir norma konstituisaun ne’ebé preve ona, no importante tebes hodi deside desizaun judisiál ka avalia fila-fali serbisu Tribunál Rekursu.
Nia mós husu PTR presiza haree rekursu iha TR ne’ebé foin iha juiz konselleiru na’in-haat, presiza halo rekrutamentu atu aumenta tan na’in-rua nune’e bele kompleta koletivu hodi labele hamosu konflitu interese iha prosesu ruma.
Iha fatin hanesan, Jurista Manuel Tilman, hateten Prezidente Repúblika (PR) re-nomeia PTR ba mandatu da-ruak tuir norma legál, ne’ebé to’o de’it iha mandatu daruak iha esperiénsia no karreira profisionál.
Prezidente Repúblika, Francisco Guterres ‘Lú Olo’, liu hosi dekretu Prezidente Repúblika númeru 23/2021, 28 abríl nomeia Deolindo dos Santos, nu’udár Prezidente Tribunal Rekursu.
PR nomeia Prezidente Supremu Tribunál Justisa, hosi entre juiz-sira, tuir artigu 86 j, artigu 124 númeru 3, hosi konstituisaun RDTL, konforme artigu 128, ho inerénsia, Prezidente Konsellu Superiór Majistratura Judisiál.
Bazeia ba artigu 164, númeru 2 hosi konstituisaun no artigu 110, númeru 1 hosi lei númeru 8/2002, 20 setembru, altera ho lei númeru 11/2004, 29 dezembru (Estatutu Majistradu Judisiais), ne’ebé estabelese Tribunál Rekursu, enkuantu sai ‘Instánsia Másima organizasaun judisiária’ eziste iha Timor-Leste, ezerse kompeténsia nu’udár Supremu Tribunál Justisa, to’o ninia funsionamentu.
Artigu 110, númeru 4 hosi Estatutu Majistradu Judisiais, kompete ba Prezidente Repúblika nomeia Prezidente Tribunal Rekursu. Estatutu Majistradu Judisiais hateten, katak, Konsellu Superiór Majistratura Judisiál prezididu hosi Prezidente Tribunál Rekursu.
Tanba ne’e, Prezidente Repúblika, tuir artigu 86 j, artigu 124, númeru 3 no artigu 164, númeru 2 hosi Konstituisaun Repúblika, no artigu 29, númeru 1, artigu 110, númeru 1 no 4 hosi Lei númeru 8/2002, 20 setembru, altera hosi Lei númeru 11/2004, 29 dezembru, dekreta hodi nomeia Deolindo dos Santos nu’udar Prezidente Tribunál Rekursu.
Deolindo dos Santos, simu ona pose hosi Xefe Estadu nu’udár Prezidente Tribunál Rekursu ba mandatu tinan haat, iha kinta ne’e.
Jornalista: Nelson de Sousa
Editór: Cipriano Colo
