DILI, 30 abríl 2021 (TATOLI)-Arsebispu Arkidioseze Metropolitana Dili, Don Virgílio do Carmo da Silva, SDB, ohin, hasai desizaun katak ba oin Vigararia Dili se laiha selebrasaun misa no sakramentu-sira ba públiku to’o loron ne’ebé konfinamentu obrigatóriu termina.
Notísia Relevante : Arsebispu Arkidioseze Metropolitana deside reativa misa
Arkidioseze Dili foti desizaun suspende atividade misa tanba konsidera deklarasaun kona-ba Estadu Emerjénsia ba dala-XIII (Cfr. Dec. Do Governo N.14/2021 de 29 de abril) no impozisaun konfinamentu domisiliáriu jerál ba populasaun munisípiu Dili (Cfr. Res. númeru 45/2021 de 29 de abril), impozisaun Serka Sanitária iha munisípiu sira, hanesan Ainaro, Dili, Ermera, no Manufahi, tuir (Cfr.Rezolusaun Governu n° 46, n°, 49; n°. 50, n°.53/2021 de 29 de abril).
“Ho ida ne’e, ha’u komunika ba Pároku, relijiozu, relijioza no sarani-sira hotu katak suspende selebrasaun misa ba públiku no sakramentu-sira iha Vigararia Dili to’o loron ne’ebé konfinamentu obrigatóriu termina iha loron 13 maiu 2021, oras 23:59 tuir (Cfr. Alínea 10 do Res. N°45/2021),” Don Virgílio do Carmo da Silva hateten liuhosi komunikadu imprensa ne’ebé Agência Tatoli asesu.
Nia dehan, selebrasaun misa no sakramentu-sira ba públiku iha Dili mak suspende maibé ba Vigararia sira seluk hanesan Aileu, Ainaro, Ermera, Oe-Cusse, no Same la’o hanesan baibain no serimónia funerál hala’o tuir orientasaun hosi Rezolusaun Governu nian (Cfr. Alinea 20 do Res.N°.45/2021).
Don Virgílio dehan, durante fulan Rozáriu, maiu, iha Vigararia Dili, reza tersu hala’o de’it iha família ida-idak no la iha prosisaun sira, maibé ba vigararia sira seluk hala’o tuir tradisaun ne’ebé durante ne’e iha. Tanba ne’e, nia fó hanoin ba sarani-sira hotu atu kumpre nafatin medida preventiva hanesan uza máskara, fase-liman ho sabaun ka uza hand sanitizer no distansiamentu sosiál, nune’e ho finalidade atu garante katak hotu-hotu ho saúde di’ak.
“Ita Inan Lalehan, Maria Virgem, sei hamutuk ho ita no hamahan ita hotu. Ha’u-nia bensaun ba imi hotu,” Don Virgílio hateten.
Jornalista : Arminda Fonseca
Editór : Francisco Simões
