DILI, 30 abríl 2021 (TATOLI)—Ministra Saúde (MS), Odete Maria Freitas Belo, lansa Mobile Application ba Rejistu Saúde Eletrónika Timor-Leste (RSETL), iha salaun Palásiu sinzas, Caicoli, sesta ne’e.
“Ida-ne’e lansamentu aplikasaun ba telemóvel atu uza hodi ajuda kolleta informasaun kona-bá vasinasaun COVID-19,” Odete Maria Freitas Belo hateten.
Notísia relevante:Pesoál liña frente 814 iha Lautém simu ona vasina
Nia esplika, tuir loloos MS halo ida-ne’e antes atividade vasina COVID-19 realiza, maibé iha tempu ne’ebá MS seidauk iha preparasaun ne’ebé di’ak.
Tanba ne’e, ohin MS uza tempu ida-ne’e atu bele halo lansamentu, no Diresaun Nasionál Saúde na Família (SnF) kolleta daudaun informasaun kona-bá vasina.
“Ezemplu hanesan na’in hira mak vasina ona, se mak seidauk vasina, balansu hosi vasina ne’e hela hira, entaun informasaun sira kona-bá vasinasaun ne’e mak ita uza ho mobile application (MA), tanba ita bele hetan password no bele hatene katak, ha’u simu vasina ba dala hira ona, ba doze primeiru ka doze segundu,” nia esplika.
Aplikasaun ne’e oferese hosi David Montalvão nu’udár Timor-oan ne’ebé estabelese sistema SnF, no bainhira iha vasinasaun COVID-19, ajuda mós MS hodi oferese gratuitamente.
Partisípa iha lansamentu ne’e Diretór Jerál Serbisu Korporativu, Marcelo Amaral, Diretór Nasionál Saúde na Família, Vítor Soares Martins, Reprezentante Unicef iha Timor-Leste, Bilal Aurang Zen Durrani, Representante OMS-TL, Vinay Bothra no seluk tan.
Jornalista: Felicidade Ximenes
Editór: Cipriano Colo
