DILI, 03 maiu 2021 (TATOLI)—Família hosi matebian Fernando do Rego ne’ebé hakotu-iis ho COVID-19, transporta ona mate-isin ba suku Macadique, postu administrativu Uatulari, Munisípiu Viqueque, segunda ne’e.
Família foti mate-isin sai hosi izolamentu Vera Cruz, iha tuku 10:00 otl, no deskansa minutu balun iha rezidénsia Quintal-boot, Dili.
Notísia relevante:Teste dala-rua ba Fernando do Rego hatudu rezultadu pozitivu COVID-19
”Ami halo negosiasaun ho Sentru Integradu Jestaun Krize (SIJK), no sei lori mate-isin ba Uatulari, hodi haloot tuir protokolu saúde. Matebian hetan asidente to’o ulun nakfera no imunidade tun, entaun teste swab pozitivu COVID-19,” Família matebian, Gregório da Silva, hateten ba jornalista-sira iha izolamentu Vera Cruz, segunda ne’e.
Fernando do Rego hetan asidente tráfegu iha área estrada públiku Kuartél Jenerál FALINTIL-Forsa Defeza Timor-Leste (F-FDTL) iha tersa (27/04), no rezulta kanek iha ain no liman, maibé hela de’it iha uma.
Iha kuarta (28/04), tanba matebian sente ulun moras, família deside lori ba Hospital Nacional Guido Valadares (HNGV), hodi halo check up.
Iha prosesu, doutór identifika matebian-nia ulun nakfera, tanba ne’e pesoál saúde-sira halo teste swab no rezultadu hatudu katak, Fernando do Rego pozitivu COVID-19, tanba ne’e ekipa Forsa-Tarefa Prevensaun no Mitigasaun transporta kedan ba sala izolamentu Vera Cruz.
Nune’e, iha domingu (02/05) tuku 7:00 otl, Fernando do Rego hakotu-iis ho idade 28, husik hela kaben no oan na’in-haat.
Tuir observasaun Agência Tatoli, iha koveiru nain-11 mak akompaña mate-isin ba Uatulari, hodi haloot tuir protokolu saúde.
Notísia relevante:Mate-isin Fernando do Rego haloot iha Uatulari tuir protokolu COVID-19
Jornalista: Felicidade Ximenes
Editór: Cipriano Colo
