DILI, 03 maiu 2021 (TATOLI)—Vise Primeiru-Ministru no Ministru Planu no Ordenamentu, José Maria dos Reis, hateten, bazeia ba relatóriu hosi ekipa liña ministeriál katak fulan maiu ne’e kompañia finaliza ona normalizasaun estrada kotu iha Embaixada Japaun oin, iha Praia dos Coqueiros.
“Tuir avaliasaun hosi Diretór Jerál Ministériu Obra Públika (MOP), dentru fulan-ida ne’e normalizasaun estrada ne’e ramata ona,” governante ne’e relata hafoin ramata reuniuan Konsellu Administrasaun Fundu Infraestrutura (KAFI) iha salaun Ministériu Finansa, Aitarak-laran, segunda ne’e.
Notísia relevante: Rekuperasaun estrada iha Embaixada Japaun oin atinje ona 40%
Enkuantu, estrada ne’e toma konta hosi kompañia Montana Diak, ne’ebé bazeia ba desizaun KAFI no haree ba kapasidade finanseira no téknika, haree katak kompañia iha kondisaun atu halo rekuperasaun emerjénsia, tanba hanesan estrada protokulu ba movimentasaun transporte.
Kustu ba projetu ne’e hamutuk $314.000 ho durasaun serbisu fulan ida, hahú abríl to’o maiu tinan ne’e.
Durante rekonstrusaun, hetan akompañamentu hosu ekipa téknika MOP hodi hasai uluk sedimentasaun, hafoin halo aterru fatuk no rai hodi nahe alkatraun.
Jornalista: Antónia Gusmão
Editora: Julia Chatarina
