DILI, 03 maiu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, Embaixadór Uniaun Europeia (UE) Andrew Jacobs no Reprezentante United Nations Development Programme (UNDP/PNUD) Tuya Altangerel, segunda ne’e inaugura ona sentru Uma Mídia Komunikasaun ne’ebé lokaliza iha uma fukun.
Prezidente Parlamentu Nasionál, Deputadu Aniceto Longuinhos Guterres Lopes, hateten programa ne’e hahú iha setembru 2020 liubá, ne’ebé iha kooperasaun entre uma fukun, PNUD/UNDP no Uniaun Europeia.
“Ohin, Embaixadór Uniaun Europeia ho Reprezentante PNUD mai Timor-Leste, mai hamutuk hodi halo inaugurasaun ida-ne’e no aproveita oportunidade ne’e, ha’u lori Parlamentu Nasionál nia naran hato’o agradese ua’in ba parseiru sira, ba sira-nia kontribuisaun hodi harii Uma Mídia Komunikasaun ida-ne’e,” Prezidente Parlamentu Nasionál ko’alia iha ámbitu inaugurasaun ne’e.
Tuir nia, ohin hahú loke ba jornalista sira hosi Parlamentu Nasionál no jornalista hosi mídia públiku no privadu ne’ebé destakada iha parlamentu atu halo kobertura ba atividade parlamentu nian.
“Ne’e fatin ba jornalista sira. Tanba situasaun pandemia COVID-19 la permite ita halo serimónia ida boot maibé simbolikamente ohin atu koenside (coincide) ho loron Liberdade imprensa,” PPN informa.
Entretantu Embaixadór Uniaun Europeia (UE) Andrew Jacobs, orgullu tanba Uma Mídia Komunikasaun inaugura ona nune’e fasilita jornalista sira-ne’ebé hala’o kobertura ba atividade parlamentár nian.
“Ida-ne’e fasilita mós kontaktu entre Parlamentu Nasionál ho ema hotu-hotu iha Timor-Leste tanba servisu jornalista nian importante iha kontestu dezenvolvimentu nian,” nia dehan.
Tuir komunikadu imprensa hosi Uniaun Europeia no PNUD, esplika iha parséria ho Parlamentu Nasionál inaugura sentru media “Uma Mídia Komunikasaun” foun ne’e.
Konstrusaun ba sentru mídia hola-parte hosi projetu desentralizasaun ho millaun $4, iha-ne’ebé, hamutuk ho inisiativa sira seluk, buka atu aselera transformasaun dijitál Parlamentu nian ba oin hodi lori lejizladór sira besik liután ba povu.
Loron Mundiál ba Liberdade Imprensa selebra kna’ar importante jornalista sira no sai hanesan lembransa ida ba Governu iha mundu tomak kona-ba nesesidade hodi promove asesu ba informasaun ho kualidade hanesan direitu báziku ema-nian.
Iha loron importante ida ne’e, Uniaun Europeia, iha parsería ho PNUD, haksolok hodi entrega ba Parlamentu Nasionál sentru ba mídia ida-ne’ebé foun no kompleta ho ekipamentu sira inklui ekipamentu ba vídeo no IT. Uma Komunikasaun sei fornese kondisaun servisu ne’ebé bazea ba teknolojia foun ba profisionál mídia sira-ne’ebé kobre asuntu parlamentáriu sira.
Uma Mídia Komunikasaun ne’ebé lokaliza iha resintu Parlamentu nian, fasilidade ne’e sei permite Parlamentu hodi sai nakloke liután, transparente no asesível ba sidadaun Timor hotu.
Iha sentru ne’e ekipadu ho sala imprensa, espasu ida konferénsia imprensa no estúdiu rádiu, edifísiu ida-ne’e sei permite jornalista sira hodi fornese informasaun sira-ne’ebé loloos no tuir tempu, nune’e promove kompriensaun ne’ebé di’akliu kona-ba funsaun no kna’ar Parlamentu nian.
Iha inaugurasaun ne’e mós Embaixadór UE Andrew Jacobs entrega mós kamera boot ida ba Sekretáriu Jerál Parlamentu Nasionál Adelino Afonso de Jesus.
Konstrusaun Uma Komunikasaun ida-ne’e parte ida hosi PNUD nia projetu “Haforsa Dezenvolvimentu Lokál Integradu hodi apoia Desentralizasaun iha Timor-Leste” no “Programa ba Konsolidasaun Governasaun Ekonómika no Sistema Jestaun Finansas Públika iha PALOP-TL II”, ne’ebé finansiada hosi Uniaun Europeia no PNUD.
Jornalista: Evaristo Soares Martins
Editór: Cancio Ximenes
