MANATUTO, 03 maiu 2021 (TATOLI)—Sekretáriu Estadu Protesaun Sivíl (SEPS), oferese apoiu emerjénsia ba família hamutuk 391, iha Postu Administrativu Laclubar, Munisípiu Manatuto, ne’ebé afetadu ba dezastre naturál iha 04 abríl.
Sasán ne’ebé família afetada-sira simu ho pakote, kompostu hosi ai-han hanesan foos, mina bimoli, susu-been, masin-midar, ikan latan sardina, biskuit, sasán kuziña no ijiéne hanesan sabaun, pastadente ho sira seluk-tan.
Notísia relevante: SEPS-CRS oferese apoiu emerjénsia ba família 178 iha Wenunuk
“Ohin ita halo lansamentu hodi fó apoiu emerjénsia hanesan ai-han no la’ós ai-han ba família afetada iha Laclubar,’’ SEPS, Joaquim Gusmão, hateten liu hosi komunikadu, segunda ne’e.
Dadus hosi SEPS, iha família hamutuk 474 iha Suku ne’en ne’ebé pertense ba Postu Administrativu Laclubar, mak afetadu ba inundasaun.
Distribuisaun apoiu iha segunda ne’e, ba uluk família 391 kompostu hosi suku Orlalan iha uma-kain 111, Suku Batara 126, Suku Funar 95, Suku Fatumakerek 36, Suku Manelima 22, Suku Sananain uma-kain ida, no família 83 hosi Suku Salanain, Orlalan ho Batara mak seida’uk simu.
“Tanba ne’e ita sei kontinua distribui tan apoiu ba família ne’ebé seida’uk simu,’’ nia dehan.
Fatin hanesan, Administradór Munisípiu Manatuto, Fernando de Sousa Junior, hateten Munisípiu ne’e iha família 1.460 mak afetadu ba dezaste naturál. Hosi númeru ne’e iha Postu Administrativu Manatuto Vila iha família 369 no Postu Administrativu Laclubar 391 mak simu ona apoiu emejénsia hosi Governu.
Nia hatutan, Komisaun Dezastre Munisipál konklui ona verifikasaun dadus ba família 474 iha Laclubar ne’ebé afetadu, iha 167 mak konsidera uma estragu makaas, tanba ne’e presiza hetan apoiu rekoperasaun.
Lian-na’in Laclubar, Abílio Martins sente kontente no agradese ba apoiu ne’e, hodi bele aguenta moris iha situasaun kalamidade.
Antes ne’e, iha mós Organizasaun Naun Governamentál (ONG), indiviu no grupu sira balun mak hala’o ona asaun solidariedade ba família afetadu iha Manatuto.
Jornalista: Nelson de Sousa
Editór: Cipriano Colo
