DILI, 04 maiu 2021 (TATOLI)—Ministériu Justisa (MJ), liu hosi Diresaun Nasionál Terras no Propriedade (DNTP), identifika ona rai Estadu ne’ebé mamuk iha fatin tolu, atu re-aloka vítima dezastre naturál, iha Dili.
“Oras-ne’e daudaun DNTP identifika ona fatin tolu, hanesan Hera, Beduku ho Tibar. Tanba ne’e ita hein de’it bainhira implementa ona re-alokasaun ba bairu foun, MJ sei aprezenta ba entidade relevante,” Ministru Justisa, Manuel Cárceres da Costa, hateten ba jornalista Agéncia Tatoli, iha edifísiu Ministériu Negósiu Estranjeiru no Kooperasaun (MNEK), Praia dos Coqueiros, Dili, tersa ne’e.
Notísia relevante:Taur orienta MJ buka fatin re-aloka vítima inundasaun iha Dili
Fatin tolu ne’e nu’udár rai Estadu, hanesan iha Hera ektare 20-resin, Beduku ektare ne’en (6) no Tibar ektare ne’en (6), atu bele asegura maluk sira ne’ebé hela iha área risku, hanesan mota-ninin, foho-lolon no Lagoa Tasi-tolu.
“Fatin tolu ne’e, tékniku DNTP identifika ho loloos ona, hodi hato’o ona relatóriu mai ha’u,’’ nia dehan.
MJ prepara fatin ne’e, hodi kontribui ba planu hosi Ministériu Planu Ordenamentu (MPO), ho Ministériu Obra Públika (MOP), kona-ba urbanizasaun.
Tuir dadus provizóriu hosi Diresaun Jerál Dezenvolvimentu Rurál, Ministéiru Administrasaun Estatál (MAE), família afetadu inundasaun iha territóriu Timor-Leste, hamutuk 28.734.
Hosi númeru ne’e, Munisípiu Dili iha família 25.881, no família afetadu ne’ebé preenxe formuláriu kona-bá uma no sasán estragu iha 40% aat natón, aat de’it ne’e iha 2% no aat totál hamutuk 48%.
Iha loron 17 abríl, Primeiru Ministru (PM), Taur Matan Ruak, orienta ona Ministru Justisa (MJ), Manuel Cárceres da Costa, atu halo identifikasaun ba rai Estadu ne’ebé mamuk, atu bele re-aloka vítima dezastre naturál, ne’ebé hela iha área risku hanesan mota ninin, foho lolon ho Lagoa Tasi Tolu ba iha fatin foun ne’ebé livre hosi ameasa inundasaun iha tempu tuir-mai.
Jornalista: Nelson de Sousa
Editór: Cipriano Colo
