PN aprova proposta-lei estabelese asosiasaun públika profisionál iha jeneralidade
DILI, 04 maiu 2021 (TATOLI)—Parlamentu Nasionál aprova ona proposta-lei estabelese rejime jurídiku ba asosiasaun profisionál sira iha faze jeneralidade.
Notísia Relevante: Reuniaun KM: aprova rejime jurídiku ba asosiasaun públika profisionál
Parlamentu Nasionál liuhosi sesaun plenária ordinária, iha loron 03 fulan-maiu ne’e halo ona aprovasaun ba proposta-lei numeru /V/(3a), ne’ebé estabelese rejime jurídiku ida ba Asosiasaun Públika Profisionál, aprova ho votu a-favór 45 no abstensaun neen (6). Substánsia hosi proposta-lei atu hamosu rejime jurídiku ida ba asosiasaun públika profisionál sira.
Proposta-lei ne’e komposta hosi 33 artigu ho kapítulu neen (6). Kapítulu I kona-ba dispozisaun jerál ho artigu 12, kapítulu II kona-ba organizasaun no funsionaentu internu ho artigu hamutuk lima (5), kapítulu III kona-ba ezersísiu no asesu ba profisaun artigu neen (6).
Nune’e mós kapítulu IV kona-ba rejime laborál, finanseiru no fiskál ho artigu hamutuk tolu (3), kapítulu V kona-ba tutela, kontrolu no responsabilidade ho artigu hamutuk lima (5) no kapítulu VI kona-ba norma tranzitória no finál ho artigu hamutuk rua (2).
Entratantu deputadu sira sei debate kada artigu iha faze espesialidade no proposta-lei ne’e aprezenta hosi Governu liuhosi Ministériu Justisa.
Prezidente Komisaun A, Deputadu Joaquim dos Santos, esplika proposta-lei ne’e atu hamosu rejime ida hodi regula asosiasaun públika sira.
Prezidente Komisaun ne’ebé trata asuntu Justisa no Konstitusionál ne’e dehan, proposta-lei jerime jurídiku ne’e atu hamoris profisionál públika sira-nian iha Timor-Leste.
Jornalista: Evaristo Soares Martins
Editór: Cancio Ximenes
