DILI, 05 maiu 2021 (TATOLI)—Governu liuhosi reuniaun Konsellu Ministru (KM) aprova Projetu Rezolusaun Governu ba alterasaun dahuluk Rezolusaun Governu númeru 45/2021, loron 29 abríl ne’ebé impoin filafali konfinamentu domisiliáriu jerál ba populasaun munisípiu Dili.
Tuir Ministru Prezidénsia Konsellu Ministru, Fidelis Manuel Leite Magalhães, Projetu Rezolusaun Governu ne’e permite sidadaun rezidente iha Dili, esesionalmente, bele sai hosi hela fatin inklui sentru akollimentu iha munisípiu Dili hodi asesu ba apoiu sosio-ekonómiku ne’ebé prevee iha Lei númeru 8/2021, loron 03 maiu.
“Ezemplu ida maka bainhira sidadaun ida presiza atu ba iha Institutu Nasionál Seguransa Sosiál (INSS) no Polísia sira hapara, sidadaun ne’e presiza hatudu komprovativu de’it katak atu ba INSS hodi bele hetan benefísiu hosi programa Ministériu Solidaridade Sosiál no Inkluzaun (MSSI) no autoridade seguransa sira autoriza,” Ministru esplika hafoin ramata reuniaun ezekutivu iha auditoriu Ministériu Finansa (MF), Aitarak-laran, kuarta ne’e.
Nune’e mós, hanesan sidadaun sira ne’ebé hakarak atu ba fatin ne’ebé hetan apoiu hanesan ai-han no apoiu umanitáriu sira seluk.
“Daudaun ne’e Orsamentu Jerál Estadu (OJE) Retifikativu promulgadu no públika tiha ona iha Jornál Repúblika, ne’ebé reflete mós ba medida apoiu oin-oin ne’ebé maka Governu sei fó ba sidadaun sira, tanba ne’e tenke halo flesibilidade oitoan ba medida sira no importante maka sidadaun ne’ebé atu sai benefisiáriu bele justifika katak la’o sai hodi hetan apoiu sira hosi Governu,” Portavóz Governu esklarese.
Aprovasaun Orsamentu Retifikativu, halo mós mudansa ba dotasaun Fundu COVID-19, ne’ebé ho montante inisiál $31.000.000 hetan ona reforsu $256.641.793, nune’e ninia totál hamutuk $287.641.793.
Nune’e, fó biban ba Governu hodi finansia medida sosio-ekonómiku hanesan apoiu ba empregu millaun $45,3, moratória kréditu millaun $2, izensaun pagamentu propina ba estudante ensinu superiór millaun $14, subsídiu internet ba estudante ensinu superiór millaun $2,2, sosa produtu alimentár hosi produtór lokál millaun $12.
Nune’e mós, subsídiu ba eletrisidade, finansia operasaun Sala Situasaun-Sentru Integradu Jestaun Krize (SS-CIGC, sigla portugés) millaun $16,7, finansia suplementu remuneratóriu ba traballadór liña frente millaun $51,9, no konklui pagamentu ba programa Cesta Bázika millaun $31.
Enkuantu, ba distribuisaun Cesta Bázika, Governu liuhosi ministériu implementadór kontinua nafatin atividade, ho kondisaun nafatin kumpre protokolu saúde hosi Organizasaun Mundiál Saúde no Ministériu Saúde.
Jornalista: Antónia Gusmão
Editora: Julia Chatarina
