DILI, 05 maiu 2021 (TATOLI)—Polísia Nasionál Timor Leste (PNTL), liberta ona autór ne’ebé distribui kupón jogu lotaria popular na’in 30, ne’ebé hetan detensaun iha edífisiu lotaria populár Kuluhun, Dili.
Ema na’in 30 ne’ebé PNTL detein, inklui feto ida, bainhira hala’o hela atividade store ka hatama osan ho kupón jogu-nian iha Kuluhun, tersa (04/05), tuku 16: 30 otl.
Notísia relevante:MTKI-PNTL hahú diskute kalendáriu inspesaun ba jogu ilegál
Tuir informasaun ne’ebé Agência Tatoli rekolla hosi parte Polísia Nasionál Serbisu Investigasaun Kriminál (PNSIK), katak, durante detensaun, polísia halo duni investigasaun no ohin autór hirak-ne’e libertadu.
Desizaun PNTL liu hosi PNSIK hodi liberta hikas autór hirak-ne’e ho razaun jogu ne’ebé sira hala’o no partisipa ne’e legál, tanba Ministru Turizmu Komérsiu no Industria (MTKI), José Lucas do Carmos da Silva, aprova pedidu autorizasaun ba retoma atividade jogu liu hosi referénsia 091/GM-MTCI/IV/2012.
Iha karta autorizasaun ho karáter urjente ne’ebé MTKI fó-sai iha 12 abríl 2021, ne’ebé Agência Tatoli asesu, konsidera rezolusaun Governu númeru 33/2021 loron 9 abríl, suspende vigância rezolusaun Governu númeru 27/2021 loron 1 abríl, hodi mantein impozisaun ba konfinamentu domisiliáriu jerál ba populasaun Dili, atu responsabiliza atividade jogu, hodi respeita mós regra saúde ba protesaun hosi COVID-19.
Nune’e, MTKI husu ba distribuidór hotu ne’ebé hola parte iha jogu, atu kumpre nafatin regra Organizasaun Mundiál Saúde (OMS) no Ministériu Saúde (MS).
Regra ne’e mak hanesan, fase bebeik liman ho sabaun, taka ibun no inus bainhira mear, labele ka’er matan, inus no ibun, evita ba fatin públiku no limita tempu iha espasu ne’ebé taka metin, kotrola distánsia fíziku la posível no obrigatóriu ba ema hotu atu uza máskara.
Jornalista: Eugénio Pereira
Editór: Cipriano Colo
