DILI, 06 maiu 2021 (TATOLI)—Polísia Nasionál Timor-Leste (PNTL), liu hosi Komandu Jerál, orienta ona Komandu munisípiu Viqueque, atu investiga kazu ema deskoñesidu tuda rahun ambulánsia hosi ekipa Pilar VII Jestaun Kazu, Ministériu Saúde, iha área suku Afoloicai, postu administrativu Watulari, munisípiu Viqueque.
Kazu ne’e akontese iha kuarta (05/05), tuku 19:06 otl, bainhira ekipa ba tula pasiente COVID-19 na’in-lima, feto ida no mane haat.
Notísia relevante:Hakanek médiku, PNTL sei prosesa suspeitu bainhira rekopera hosi COVID-19
Akontesimentu ne’e rezulta vidru abulánsia parte kuana no oin rahun, no motorista ho médiku na’in-rua inklui pasiente COVID-19 na’in-lima, la sofre kanek, maibé trauma.
“Ema deskoñesidu tuda ambulánsia rezulta vidru boot iha parte oin no parte odamatan kuana rahun. Sira ba tula pasiente na’in-lima, fila ona atu lori ba Sentru Saúde Viqueque,” Portavóz Komandu Jerál PNTL, Superintendente Xefe, Arnaldo de Araújo hateten ba jornalista-sira, iha Komandu Jerál PNTL, Caicoli, Dii, kinta ne’e.
PNTL Viqueque hamutuk ho ekipa Sala Sitasaun Sentru Integradu Jestaun Krize (SIJK), halo kedan investigasaun iha terrenu.
“Ne’e krime, ita sei hein rezultadu investigasaun hosi Komandu Viqueque ho ekipa SIJK,” Arnaldo de Araújo hateten.
Ekipa SIJK ho Ministériu Saúde (MS) koordena ona hodi kontinua motiva ekipa médiku iha terrenu atu kontinua serbisu, hodi salva povu hosi ameasa peste letál COVID-19.
Jornalista: Eugénio Pereira
Editór: Cipriano Colo
