DILI, 07 maiu 2021 (TATOLI)—Ministériu Interiór (MI) hasai ona despaixu foun, ba oráriu abertura fronteira terrestre ne’ebé kada semana dala-rua, ne’ebé desizaun ne’e aplika iha ámbitu Estadu Emerjénsia da-XIII, to’o 01 juñu.
Tuir Diretór Jerál Autoridade Aduaneira (AA)/Alfándega, José António Fátima Abílio, fronteira terrestre Batugade kada semana loke dala rua iha segunda loke ba sasán no ema sai, hahú oras 09:00 to’o 13:00, enkuantu iha kuarta loke ba sasán no ema tama iha oras hanesan.
“Ajénsia no kompañia sira bainhira atu hatama sasán hosi fronteira terrestre, tenke submete pedidu no hetan aprovasaun hosi Ministériu Interiór no Sala Situasaun-Sentru Integradu Jestaun Krize(SS-GIGC), ho koordenasaun hamutuk ho ekipa instituisaun relavante sira iha fronteira inklui Ministériu Saúde hodi dezinfeta sasán hafoin hatama,” Diretór Jerál Alfándega relata ba Agência TATOLi iha nia kna’ar fatin, Palásiu Governu, sexta ne’e.
Kona-ba ema tama hosi fronteira, Dirijente ne’e komfirma, depende ba autorizasaun hosi SS-CIGC, enkuantu sasán nesesidade bázika sempre tama hela de’it.
“Bainhira fronteirra loke, karreta truck hamutuk 40 mak tama, depende pedidu, tama duni maibé ho autorizasaun hosi Sala Situasaun, nesesidade bázika sira mak sempre tama,” nia akresenta.
Tuir Diretór Jerál Alfándega, karreta truck sira tula sasán hosi Indonézia, bele ultrapasa liu mai territóriu nasionál maibé tenke dezinfeta no troka motorizta.
Jornalista: Antónia Gusmão
Editora: Julia Chatarina
