ILO finansia programa $5.00 iha Suku Lacu-Mesak
DILI, 10 maiu 2021 (TATOLI)-Xefe Suku Lacu-Mesak, Postu Administrativu Laclo, Munisípiu Manatuto, Filomeno Rodrigues Pereira Cárceres, informa Internasionál Labour Organization (ILO) finansia programa $5.00 iha Suku Lacu-Mesak hanesan meiu ida atu rekoopera ekonomia populasaun ki’ik-sira nian iha situasaun kalamidade no pandemia COVID-19.
Notísia Relevante : Xefe Suku Lacu-Mesak husu Governu normaliza Mota Laclo
Xefe Suku Lacu-Mesak, Filomeno Rodrigues Pereira Cárceres, informa programa $5.00 ne’ebé ILO finansia ne’e bazeia ba proposta hosi Ministériu Obras Públiku (MOP) Manatuto no kanaliza hosi MOP ba Suku Lacu-Mesak liga ba infraestrutura públiku hanesan estrada urbana no lokál.
“ILO finansia programa $5.00 ne’ebé kanaliza hosi MOP ba komunidade Suku Lacu-Mesak ne’e katak komunidade servisu loron ida hetan $5.00,” Filomeno Rodrigues Pereira Cárceres, informa ba Agência Tatoli liuhosi telefónika, segunda ne’e.
Lideransa komunitáriu ne’e dehan, programa $5.00 iha Suku Lacu-Mesak ne’e di’ak tebes ba abitante-sira tanba iha situasaun agora Estadu Emerjénsia inklui serka sanitária maske Manatuto la tama serka sanitária, maibé programa ne’e bele ajuda netik komunidade nia ekonomia.
“Programa ne’e liuhosi MOP no ILO maka fasilita no finansia hodi prevee mai hadi’a estrada ho montante orsamentu $14.000, atu hadi’a estrada maka hanesan, estrada entre Postu Administrativu Laclo liga ba Postu Administrativu Metinaro, Munisípiu Dili nian hamutuk kilómetru 10 ba loron 18 ho totál benefisiáriu hamutuk 120,” Filomeno Rodrigues Pereira Cárceres haktuir.
Jornalista : Arminda Fonseca
Editór : Francisco Simões
