iklan

NASIONÁL, HEADLINE, KAPITÁL

Konsultór finaliza ona estudu viabilidade Sidade Universitária Aileu 

Konsultór finaliza ona estudu viabilidade Sidade Universitária Aileu 

Esbosu estudu viabilidade Sidade Universitária Aileu. Imajen/MOP

DILI, 10 maiu 2021 (TATOLI)–Konsultór internasionál, Bernabad Arquitetura, SLP iha Timor-Leste no España, finaliza no aprezenta ona relatóriu estudu viabilidade Sidade Universitária, iha munisípiu Aileu ba ekipa tékniku Ministériu Obra Públika (MOP).

Aprezentasaun ne’e via telekonférensia, ne’ebé asiste hosi ekipa tékniku MOP, kompostu hosi Diresaun Jerál Abitasaun no Urbanizmu, Diresaun Nasionál Edifikasaun, asesór Gabinete Ministru, tékniku Planeamentu Urbanu no Abitasaun no ekipa tékniku hosi Ministériu Ensinu Superiór, Siénsia no Kultura (MESSK) ne’ebé hamutuk hamahon-an iha Project Steering Committee (PSC).

“Objetivu aprezentasaun ne’e atu trasa serbisu konsultór ho rigór, tuir kalendáriu válidu ba projetu Sidade Universitária Aileu ne’ebé mak daudaun to’o ona iha faze aprezentasaun draft final report ba estudu viabilidade, tuir rekerimentu termu referénsia no konsiderasaun tékniku sira,”refere nota ne’ebé Agência TATOLI asesu, segunda ne’e.

Nune’e, bainhira relatóriu finál hetan ona aprovasaun husi PSC mak konsultór sei aprezenta dezeñu enjeñeiru detalladu iha faze tuir mai.

Enkontru via virtuál ne’e, foku ba dezenvolvimentu estudu viabilidade ne’ebé kabe ba aspetu fíziku ne’ebé konsultór halo estudu topografia no jeotékniku liga ba kondisaun no karatéristika rai iha área estudu hodi harii universidade no área risku sira, sosiál, ekonómiku no transporte, inklui iha faze no dezeñu enjeñeiru detalladu iha analiza ba aspetu merkadu no finanseiru.

Foku mós dezenvolvimentu ba dezeñu preliminár no aprosimasaun ariteturál ba área refere, kompletu ho fasilidade esensiál universidade no  sei iha mós sesaun aprezentasaun ketak ba PSC hodi hatuur opsaun no alternativa ba dezeñu nian.

“Konsultór mós identifika obstákulu sira iha situasaun pandémia COVID-19, ne’ebé konsege halo atraza iha planu serbisu no implementasaun sira iha terrenu tuir kalaendáriu ne’ebé mak iha ona,” haktuir nota hosi MOP.

Hosi parte PSC ne’ebé lidera hosi Diretór Jerál, Roger Tertuliano Belo, halo esforsu atu revee no avalia serbisu konsultór hodi fó rekomendasaun pertinente atubele asegura kualidade estudu.

MOP prevee orsamentu ba estudu viabilidade no no dezeñu enjeñeiru detalladu Sidade Universitária Aileu hamutuk $550.000.

PSC kompostu hosi na’in ba projetu rasik MESSK, fasilitadór hosi MOP hamutuk ho Ministériu Planu no Ordenamentu (MPO), inklui Ajénsia Dezenvolvimentu Nasionál (ADN).

Jornalista: Florêncio Miranda Ximenes

Editora: Julia Chatarina

iklan
iklan

One Comment

  1. Agradese tamta beke finaliza ona Digenho sidade universitario Aileu ,,, maibe tenke tau moss prioridade ba Aileu oan htu( fo bolseiro ba Aileu oan)

Leave a Reply

iklan
error: Content is protected !!