DILI, 11 maiu 2021 (TATOLI)—Ekipa téknika saúde Austrália (AUSMAT, sigla ingles) iha segunda (10/05), halo aprezentasaun ida iha reuniaun komisaun interministeriál ne’ebé prezide hosi Primeiru-Ministru, Taur Matan Ruak iha salaun Ministériu Finansa (MF).
Iha aprezentasaun ne’e AUSMAT rekomend Governu liuhosi Ministériu Saúde (MS) atu aumenta okxijéniu hodi prepara ba senáriu piór ligadu ho surtu COVID-19 iha Timor-Leste.
Bazeia ba rekomendasaun ne’e maka iha tersa ne’e, Xefe Governu konvoka reuniaun hikas ho MS inklui ekipa Sala Situasau-Sentru Intergadu Jestaun Krize (SS-CIGC, sigla portugés) atu analiza no responde ba rekomendasaun sira ne’e.
Tuir Ministra Saúde, Odete Maria Freitas Belo, MS sei serbisu hamutuk AUSMAT hodi apoia halo levantamentu hatán ba situasaun piór iha rai-laran.
“Iha reuniaun interministeriál, ekipa hetan oportunidade aprezenta relatóriu hosi levantamentu ne’ebé sira rasik halo inklui hato’o buat barak atu Governu hadi’a sé karik tama iha faze ne’ebé krítiku liu. Asuntu importante ne’ebé sira levanta maka disponibilidade okxijéniu no sira husu presiza aumenta selindru okxijéniu, nune’e mós produsaun okxijéniu ne’e rasik tenke aumenta,” Ministra Odete relata hafoin ho ekipa ramata reuniaun ho PM Taur iha Rezidénsia Farol, tersa ne’e.
Ministra Saúde dehan, MS labele halo avaliasaun rasik ba ninia-an, tanba ne’e husu apoia ba ekipa Austrália ne’e hodi halo levantamentu ba fasilidade sira ne’ebé iha hodi responde ba COVID-19 bainhira Timor-Leste tama ona ba senáriu piór.
Kona-ba okxijéniu, dadaun ne’e MS seidauk hasoru difikuldade tanba sei sufisiente no bele atende ba pasiente sira ne’ebé presiza.
“Kona-ba okxijéniu agora seidauk iha ema ida mak falta okxijéniu, ne’ebé sei iha hodi bele atende pasiente sira ne’ebé presiza hanesan iha Hospital Nacional Guido Valadares (HNGV) no izolamentu Vera Cruz. Maibé karik tama iha senáriu piór maka presiza aumenta selindru okxijéniu entre 1.000-2.000,” nia akresenta.
Daudaun ne’e iha hela faze prosesu aprovizionamentu ba selindru 1.000.
Sorin seluk, Organizasaun Mundiál Saúde (OMS) rekomenda mós katak la’ós selindru de’it mak Timor-Leste presiza, maibé tenke halo produsaun.
“Atualmente iha kompañia ida mak prodús okxijéniu, entaun OMS prontu atu ajuda atu estabelese tan mákina produsaun okxijéniu, espera katak ne’e bele realiza,” nia hatutan.
MS sei rejista rekomendasaun sira no sei kumpre.
Jornalista: Antónia Gusmão
Editora: Julia Chatarina
