DILI, 12 maiu 2021 (TATOLI) – Estudante finalista hamutuk 242 hosi Fakuldade Medisina, Fakuldade Edukasaun Arte Humaniora (FEAH), Fakuldade Ekonomia Jestaun, Fakuldade Siénsia Sosiál no Fakuldade Enjeñaria, Universidade Nasionál Timor Lorosa’e (UNTL) preparadu ona atu tuir graduasaun virtuál ka online iha loron 31 maiu ne’e.
Notísia Relevante : MESSK ezije mekanizmu graduasaun virtuál ba UNTL
Vise-Reitór UNTL trata asuntu Estudantíl, Samuel Venâncio de Sousa Freitas, informa lista estudante finalista ne’ebé UNTL submete ona ba Ministériu Ensinu Superiór, Siénsia no Kultura (MESSK) hamutuk 633 graduandu. Lista sira-ne’e MESSK sei omóloga tiha mak depois fahe fila-fali 242 tama ba graduasaun virtuál ka online iha fulan ne’e no 391 hein bá graduasaun prezensiál.
“Ami submete lista sira-ne’e ba MESSK atu kumpre nafatin kalendáriu administrativu ba graduasaun nian. Ami tenke haruka uluk lista graduandu-sira nian ba MESSK hodi hetan omologasaun depois mak estudante 242 tama ba graduasaun online no 391 hein ba graduasaun prezensiál,” Samuel Venâncio de Sousa Freitas, informa ba Agência Tatoli iha ninia servisu fatin, kampus UNTL, kuarta ne’e.
Samuel afirma katak UNTL kumpre pedidu Estudante finalista 242 nian hodi halo preparasaun ba graduasaun online. Maibé depende ba desizaun Governu nian.
“Ita bele halo planu atu realiza graduasaun online bá estudante 242 iha tempu serka sanitária no konfinamentu obrigatóriu. Maibé Governu deside hapara ona, maka ita fila fali ba situasaun normál, ita atu realiza tan graduasaun online halo saida,” Samuel tenik.
Samuel haktuir, UNTL deside ona ohin loron ikus hodi fó tempu ba Universidade atu halo publikasaun naran estudante 242 nian iha pájina UNTL no Facebook. Karik la konkorda atu tuir graduasaun online sei iha tempu atu retira hosi lista ne’e.
Jornalista : Tomé Amado
Editór : Francisco Simões
