DILI, 14 maiu 2021 (TATOLI)-Pupulasaun uma-kain 275 ho totál abitante 1.409 iha Aldeia tolu hosi Suku Dotik, Postu Administrativu Alas, Munisípiu Manufahi, seidauk asesu liña eletrisidade.
Koordenadór Asosiasaun Estudante Juventude Weberek, Wesar, Sarin (AEJOWWSA), Jaimito Siqueira Gusmão, hateten iha 2018 kompañia lokál Umber Lda, maka ezekuta projetu atu instala eletrisidade ba komunidade aldeia tolu ne’e, hanesan Weberek, Wesar no Sarin, maibé kompañia refere abandona obra ne’e to’o agora tinan-tolu ona laiha rezultadu.
“Timor-Leste restaura ninia independénsia hosi 2002 to’o mai agora, komunidade hosi aldeia tolu, hanesan Weberek, Wesar no Sarin sente seidauk hetan benefísiu hosi ukun-an ida ne’e tanba ami seidauk asesu ba eletrisidade,” Jaimito Sequeira Gusmão, hateten ba jornalista sira iha Sede Sentru Nasionál Juventude Timor-Leste, Faról, Dili, sesta ne’e.
Ho situasaun hirak ne’e, nia dehan, iha loron 10 maiu 2021, tuir deklarasaun supervizór, Eletrisidade de Timor-Leste Empreza Públiku (EDTL.EP) Munisípiu Manufahi, ne’ebé hateten katak hahú fulan agostu, tinan ne’e, sei instala liña eletrisidade ba aldeia tolu refere inklui ba komunidade Suku Lima hanesan, Suku Tutuluru, Rotutu no Grotu iha Postu Administrativu Same, no Suku Mideilu no Bermana, Postu Administrativu Turicai nian.
“Ho deklarasaun ida ne’e ami ASJOWWSA hamutuk ho komunidade ami hato’o ami-nia apresiasaun ba VIII Governu Konstitusionál, liuliu ba EDTL.EP Munisípiu Manufahi, tanba ho Governu nia esforsu rona duni povu nia halerik. Ami husu tebes ba Governu tenke finaliza duni projetu ida-ne’e ba komunidade ne’ebé durante ne’e halerik loos ba eletrisidade,” Jaimito Sequeira Gusmão hateten.
“Ami husu ba komunidade tomak iha Suku Dotik, hahú hosi lideransa komentáriu to’o Administradór Munisípiu, inklui veteranu koopera ho Governu hodi finaliza obra ne’ebé Governu fó sai ona tuir tempu determina,” nia hateten.
Jornalista : Arminda Fonseca
Editór : Francisco Simões
