Prizioneiru-guarda prizionál Becora submete ba teste swab
DILI, 14 maiu 2021 (TATOLI)—Prizioneiru hamutuk ho guarda prizionál iha prizaun Becora, submete ona ba teste swab, ne’ebé atende direta hosi ekipa médiku atu bele evita transmisaun COVID-19, iha sesta ne’e.
Teste swab ne’e realiza tanba hakarak prevene an hosi transmisaun iha fatin ne’e, hafoin prizioneiru Juga Gama hakotu-iis ho COVID-19.
Notísia relevante:Mate-isin Juga Gama haloot ona iha semitériu Becusse
Diretór Estabelesimentu Prizaun Becora, João Domingos, hateten teste swab ne’e atu bele buka-tuir kontaktu besik, tanba oras-ne’e daudaun iha ona kazu óbitu COVID-19, iha prizaun Becora, nune’e bainhira deteta tan pozitivu balun bele izola hodi evita transmisaun virus ne’e.
Kona-bá kazu matebian Juga Gama ne’ebé sofre COVID-19, parte prizaun iha presepsaun tolu. Ida, bele hetan transmisaun liu hosi guarda prizionál-sira. Rua, bainhira ba iha fatin públiku hanesan lori ba tratamentu iha Ospitál Nasionál Guido Valadares (HNGV sígla portugés), no tolu, pesoál saúde ba fó tratamentu saúde iha prizaun.
“Maibé, ida-ne’e depende ba rezultadu teste swab mak bele fó-sai,’’ João Domingos, hateten ba jornalista-sira iha semitériu Becusse, sesta ne’e.
Nia dehan, durante implementasaun Estadu emerjénsia no serka sanitária ho konfinamentu obrigatóriu iha munisípiu Dili, ho despaixu Ministru Justisa (MJ), Manuel Cárceres da Costa, ne’ebé deside suspende atividade vizita família no atividade sosiál iha prizaun laran.
Diretór ne’e hatutan, sira-nia parte submete ona ba teste swab no iha lorokraik ne’e kedan ka aban bele hetan rezultadu.
“Ami husu ona ba Ministru Justisa, bainhira dadur balun detetadu pozitivu, ba kazu ne’ebé kamán bele halo autokuarentena iha prizaun, koordena ho parte saúde,’’ nia subliña.
Entretantu, oras-ne’e daudaun Prizaun Becora iha prizioneiru hamutuk na’in 541.
Notísia relevante:Prizioneiru Juga Gama hakotu-iis iha izolamentu Vera Cruz
Jornalista: Nelson de Sousa
Editór: Cipriano Colo
