DILI, 17 maiu 2021 (TATOLI)–Ministru Obra Públika (MOP), Salvador Eugênio dos Reis Soares Pires, hateten, rekonstrusaun ba infaestrutura públika ne’ebé hetan estragu hosi dezastre naturál foin lalais iha faze verifikasaun dezeñu.
“Hasoru Primeiru-Ministru hodi relata atividade rekonstrusaun estragu hotu ne’ebé afeta hosi dezastre naturál fulan-abríl liubá. Komponente sira ne’ebé mak Konsellu Administrasaun Fundu Infraestrutura (KAFI) deside, iha fatin balun tama iha emerjénsia. Daudaun ne’e ekipa tarefa infraestrutura ne’ebé estabelese bazeia despaixu Primeiru-Ministru atu halo serbisu refere, ne’ebé ekipa halo ona dezeñu rekonstrusaun no daudaun ne’e iha hela verifikasaun Ajénsia Dezenvolvimentu Nasionál (ADN) nian,” Ministru Salvador relata hafoin ramata reuniaun ho Primeiru-Ministru, Taur Matan Ruak iha Rezidénsia Farol, segunda ne’e.
Nia hatutan, bainhira dezeñu sira ne’e halo verifikasaun hotu ona maka sei hato’o pedidu ba KAFI hodi diskute no hetan aprovasaun hodi avansa ba rekuperasaun.
Tuir dadus, estragu sira ne’ebé mak tama iha emerjénsia maka RTK-diresaun Maloa bá Tuana-laran, estrada Bidau iha Hospital Nasional Guido Valadares (HNGV) nia kotuk, estrada ligasaun Tibar bá Ermera, Ponte Loes, Ponte Bekusi-Taibesi no estrada CPLP ba tasi ibun Bebonuk, inklui estrada Embaixada Japaun oin ne’ebé iha faze finál.
“Loloos kálkulu definitivu hafoin verifikasaun hosi ADN, maibé tuir ekipa tarefa informa mai katak rekonstrusaun ba fatin ualu ne’e sei gasta osan millaun $4-resin,” nia akresenta.
Liga ho estragu iha munisípiu, ekipa tarefa forma ekipa tolu ne’ebé fahe ba rejiaun tolu hanesan oeste, sentru no leste, ne’ebé desde semana kotuk tun ona ba terrenu hodi halo kualifikasaun no serbisu obra públika munisipál no autoridade lokál sira rekolla dadus, atu nune’e halo planifikasaun no kuantifikasaun ba estragu sira.
“Relatóriu iha ona, maibé ha’u mak seidauk hetan sumáriu,” governante ne’e hatutan.
Jornalista: Antónia Gusmão
Editora: Julia Chatarina
