DILI, 17 maiu 2021 (TATOLI)–Sekretaria Estadu Protesaun Sivíl (SEPS) provizóriamente suspende apoia sasán ba vítima inundasaun iha munisípiu Dili tanba stock sasán iha armazen mamuk.
Enkuantu, apoia ba vítima sira iha munisípiu kuaze ramata ona tanba antes ne’e stock sasán iha munisípiu sufisiente, nune’e iha ámbitu akontese dezastre naturál, ekipa sira iha munisípiu distribui ona.
“Komundiade afetadu iha munisípiu maioria hetan ona apoiu hosi Governu, maibé Dili besik família 2.000 mak seidauk hetan apoiu tanba stock iha armazen mamuk. Atu dehan katak ajudu umanitáriu ne’ebé protesaun sivíl tau ein pakote katak hahán pur pakote,” Sekretáriu Estadu Protesaun Sivil, Joaquim José Gusmão Martins, relata hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.
Maski nune’e, governante ne’e dehan, Governu kontinua prevee sasán hodi apoia vítima afetadu tanba daudaun ne’e halo hela ezekusaun ba Orsamentu Retifikativu ne’ebé mak promulgadu ona.
“Iha Orsamentu Jerál Estadu halo predisaun ida katak osan ne’e sei ajuda ba vítima entre família 2.000 to’o 3.000, maibé númeru agora ne’e boot liu. Tanba ne’e Orsamentu Retifikativu aprovadu ona no iha fundu rezerva kontijénsia, ba hirak ne’ebé seidauk hetan apoiu ami hato’o ona ba Ministériu Finansa atu disponibiliza osan hodi nune’e bele fó osan rápidamente ba vítima ne’ebé seidauk hetan apoiu,” Sekretáriu Estadu esplika.
Dadus atuál família afetadu nível territóriu ne’ebé rejistadu iha SEPS hamutuk 32.238, ne’ebé hosi númeru ne’e iha Dili hamutuk 236.379.
Tuir Sekretáriu Estadu, dadus sira ne’e kada loron aumenta tanba iha fatin balun maka ekipa la konsege to’o no foin mak simu hosi autoridade lokál sira.
Jornalista: Antónia Gusmão
Editora: Julia Chatarina
