DILI, 18 maiu 2021 (TATOLI)-–Ministériu Obra Públiku (MOP) liuhosi Diresaun Nasionál Aprovizionamentu (DNA) finaliza ona dezeñu enjeñeiru detalladu hosi projetu hamutuk 35.
Diretór Nasionál Aprovizionamentu MOP, Quintiliano Belo, hateten, iha tinan 2019, MOP foku ba estudu no dezeñu enjeñeiru detalladu estrada nasionál, ponte no planu mestre ba inklui polo dezenvolvimentu no reviltalizasaun ho totál kustu millaun $12, nune’e bele hahú konstrusaun iha tinan tuir mai.
“Projetu 35 kompostu hosi estudu no dezeñu enjeñeiru detalladu hosi estrada nasionál 13, ponte 10, planu mestre bee-moos iha munisípiu neen, planu mestre ba Hospital Nasional Guido Valadares (HNGV) no ospitál Lahane, estudu ba zona ekonomia Baucau no Batugade, Sidade Universitáriu inklui revitalizasaun Aitarak-laran, Dili,” Diretór Quintiliano Belo informa ba Agência TATOLI, iha ninia knaar fatin, Caicoli, tersa ne’e.
Tuir Dirijente ne’e, MOP liuhosi DNA antes ne’e promove prosesu tomak ba públiku no selebra ona kontratu iha tinan 2019 nia rohan ho espetativa ida katak Governu bele komesa konstrusaun sira hahú tinan 2020 mai oin.
“Maibé infelizmente la akontese tanba Timor-Leste tama situasaun ne’ebé mundu tomak mós afeta hanesan COVID-19. Maski nune’e, konsultór sira ne’ebé sai manan nain mantein no kontinua halo sira-nia knaar hodi kumpre kontratu no agora daudaun tama ona iha faze finál ba dezeñu detalladu no Bill of Quantity (BoQ).
Faze finál dezeñu detalladu no BoQ ba estrada dirasaun Laga-Baguia ho kustu ba estudu purvolta $400.000 resin, estrada urbana Maliana ho kustu $400.000 resin, estrada Aileu to’o Liquidoe $300.000, estrada urbana Dili $200.000, estrada Alas-Welaluhu $500.000 resin.
Nune’e mós, dezeñu detalladu ba estrada Soibada ho kustu $100.000 resin, estrada Bobonaro to’o Lolote $100.000 resin, estrada Uatulari-Laisorulai $400.000 resin, estrada Luca to’o Lacluta $100.000.
Dezeñu detalladu ba estrada Uica to’o Quilicai-Ossu ho nia kustu $500.000, estrada Uatualari to’o Laisorulai ho nia kustu $400.000, estrada Aileu to’o Gleno $400.000 no estrada Turiscai to’o Alas ho kustu $700.000 resin.
Iha mós dezeñu detalladu ba ponte hamutuk 10 hanesan ponte Samalari, Sumaco, Maloa, Matadouro RTK, Comoro Mota Ulun, Liurai, Maubara 1, Bera Railaco, Sanfuk, Tutuluro no Same-fahi nehan ne’ebé nia estudu halo hosi Konsultór Vox da Vinci no Konsultór Lelo ho kustu $500.000 ba kada konsultór.
Aleinde ne’e, MOP halo estudu planu mestre ba ospitál rua mak hanesan HNGV no ospitál Lahane, estudu ba reviltalizasaun Aitarak-laran, sidade universitáriu no polo dezenvolvimentu ba Baucau no Batugade.
Estudu planu mestre bee-moos ba munisípiu neen hanesan Ainaro, Aileu, Ermera, Covalima, Manufahi no Baucau ho kustu $3.300.000.
“Dezeñu ba estudu detalladu no planu mestre sira ne’e kuaze finaliza ona no iha tempu badak ami haruka ba Ajensia Dezenvolvimentu Nasionál (ADN) hodi halo verifikasaun prévia kustu sira, hafoin halo konkursu públiku iha Komisaun Nasionál Aprovizionamentu (CNA) tuir kalendáriu,” Diretór Nasionál ne’e dehan.
Tuir livru Orsamentu Jerál Estadu ne’ebé aprovadu katak rezultadu hosi estudu hirak ne’e, nia konstrusaun fizíku tenke hahú tinan ne’e ho karater projetu pluri-annuál.
“Orsamentu ba konstrusaun fizíku alokadu ona iha fundu infrastrustrutura tinan 2021,” nia hatutan.
Ministru Obra Públika, Salavador Eugênio Soares dos Reis Pires, antes ne’e fó instrusaun ona ba tékniku sira iha Diresaun Nasionál Estrada, Ponte no Kontrolu Cheia (DNEPCC, sigla Portugés) atu halo esforsu hodi hato’o lalais dokumentu sira ba Kosellu Administrasaun Fundu Infraesturutura (KAFI) no CNA hodi halo prosesu aprovizionamentu molok tama trimestre ikus tinan ne’e.
Jornalista: Florêncio Miranda Ximenes
Editora: Julia Chatarina
