DILI, 19 maiu 2021 (TATOLI)-Sasán nesesidade báziku ka ai-han nia folin hahú sa’e iha munisípiu neen (6) ne’ebé Governu aplika serka sanitária.
Notísia Relevante : Modo-tahan iha Merkadu Manleuna ladún folin
Liuhosi peskiza no observasaun Core Group Transparency-Timor-Leste (CGT-TL) hamutuk ho nia membru Mata Dalan Institute (MDI) ba munisípiu neen ne’ebé aplika serka sanitária (SS) hatudu katak afeta ba folin ai-han ka nesesidade báziku hahú sa’e.
Portavós CGT-TL no MDI, Miguel de Jesus hateten, apresia ba intervensaun Governu nian bainhira moras surtu COVID-19 invade Timor-Leste hahú kedas aplika ona Estadu Emerjénsia (EE) to’o ohin loron nu’udár esforsu hodi prevene no hakotu propagasaun peste letál ne’e atu labele da’et tan ba ema seluk.
Mekanizmu ka meiu barak ne’ebé Governu foti, tuir Miguel de Jesus nia haree iha intensaun di’ak tebes tanba atu salva sidadaun sira-nia vida, maske ohin loron númeru moras sa’e no konsege hakotu ona ema balun nia vida.
Notísia Relevante : Negosiante-sira iha Liquiça susar ba beibeik
“Maske nune’e parte balu hosi ami-nia observasaun no peskiza ba implementasaun serka sanitária iha Munisípiu Baucau, Laútem, Covalima, Aileu, Ermera no Bobonaro, hatudu katak polítika ne’ebé foti fó impaktu negativu lubuk ida iha sosiedade liuliu ba ai-han la folin iha merkadu-sira, inklui iha sosiedade balu ne’ebé tuir loloos iha nivel konsiénsia maka’as hodi kumpre regra Estadu Emerjénsia, maibé realidade laiha,” Miguel de Jesus, informa ba jornalista iha Salaun FONGTIL, Caicoli, Dili, kuarta ne’e.
Nia hatutan, durante sira-nia peskiza iha munisípiu neen ne’e, deskobre katak aleinde iha efeitu pozitivu ba aplikasaun regulamentu serka sanitária ne’ebé sosiedade-sira tenke kumpre hodi hala’o metigasaun ba katastrófika situasaun saúde rai-laran nian, maibé iha periodu SS no konfinamentu obrigatóriu lori impaktu negativu ba povu kbiit-laek sira.
Miguel de Jesus dehan, ho limitasaun movimentu hosi ema no transporte públiku nian halo komunidade, nia reziliénsia ba moris iha risku nia-laran, inklui mós ba komunidade ne’ebé hola parte iha moris negósiu ne’ebé kuaze depende maka’as ba sirkulasaun transporte hodi lori produtu agrikultura no nesesidade bázika-sira seluk ba Kapitál Dili entre munisípiu sira seluk, inklui mós ba konsumidór sira.
“Implikasaun seluk mak transferénsia sasán ka nesesidade bázika hosi transporte ida ba transporte seluk, halo nesesidade bázika nia folin hahú sa’e maka’as, kuaze hosi ita-nia komunidade ne’ebé fa’an tutan tenke selu transporte folin karun dala rua to’o dala haat,” nia tenik.
Buat sira-ne’e akontese, nia esplika, bainhira transporte sasán hosi Munisípiu Covalima mai Dili tenke transfere sasán to’o dala haat, no Dili ba Laútem tenke transfere dala tolu to’o dala haat kompara ho antes sira transporta ho direita dala ida.
Nia haktuir, impaktu hosi transferénsia sasán ne’e halo foos folin sa’e maka’as, hanesan foos Globus kilograma 25, inísiu ho folin $13.50, negosiante sira balu hasa’e nia folin $15.50 to’o $18.00.
“Tuir ami haree sasán folin ne’ebé sa’e la’ós de’it foos, maibé mós nesesidade báziku sira seluk. Iha tempu hanesan kapasidade kompras hosi komunidade menus liu, ne’ebé fó impaktu tanba ema la sosa, nune’e sasán produtu balu hetan estragu,” nia haktuir.
Nia subliña, iha munisípiu neen ne’ebé sira observa sasán no produtu balu hetan estragu tanba folin sa’e maka’as, nune’e konsumidór balaun deside hili opsaun seluk ne’ebé nia kapasidade to’o no la nesesáriamente tenke konsumu, hanesan modo repollu, fehuk-ropa, liis, señora, no ai-han sira seluk.
Ho realidade situasaun ne’ebé CGT-TL no MDI rekomenda ba Governu presiza muda ka revé fali regulamentu ba transferénsia sasán entre munisípiu sira transferénsia dala-ida ba fatin ka destinasaun ne’ebé atu to’o ba. Nune’e bele hafasil mekanizmu transportasaun nesesidade báziku sira hosi fatin ida ba fatin seluk iha territóriu nasionál.
“Nafatin aplika protokolu ne’ebé Ministériu Saúde fó sai hodi halo teste swab ho rápidamente ho hamenus burokrasia naruk no kleur atu ajente ekonómiku-sira nafatin hala’o sira-nia atividade hodi nune’e bele ajuda normaliza folin sasán iha territóriu nasionál no ajuda minimiza risku vulnerabilidade hosi komunidade kbiit-laek sira ne’ebé lakon sira-nia oportunidade hosi situasaun ida ne’e,” nia hateten.
Sira husu ba Governu atu fasilita ajente ekonómiku-sira ho lais, hanesan fasilita dokumentu gia marxa, iha loron ida nia-laran, inklui mós teste swab, atu nune’e, atividade ekonomia rai-laran bele la’o nafatin atu labele hamosu problema sosiál sira seluk.
Jornalista : Arminda Fonseca
Editór : Francisco Simões
