DILI, 19 maiu 2021 (TATOLI)—Prezidente Repúblika, Francisco Guterres Lú Olo, ezerse ninia kompeténsia konstitusionál hodi fó indultu ba prizioneiru na’in-15 iha selebrasaun loron Restaurasaun Independénsia Timor-Leste ba dala-19.
Notísia Relevante: MJ propoin prizioneiru 58 atu hetan indultu
Liuhosi Dekretu Prezidente Repúblika ne’ebé publika iha Jornal Repúblika iha 19 maiu 2021, ho númeru 25/2021, 26/2021, 27/2021, 28/2021, 29/2021, 30/2021, prizioneiru na’in-neen (6) hetan liberdade totál, prizioneiru na’in-haat (4) hetan indultu parsiál fulan-neen (6) hosi pena prizaun liuhosi Dekretu Prezidente Repúblika númeru 31/2021, no prizioneiru na’in-lima (5) hetan indultu parsiál ho metade pena prizaun liuhosi Dekretu Prezidente Repúblika númeru 32/2021.
“Dekretu Prezidente sira-ne’e sei tama iha vigor iha 20 maiu 2021,” refere komunikadu imprensa ne’ebé Agência Tatoli asesu, kuarta ne’e.
Xefe Estadu uza nia kompeténsia eskluziva fó liberdade totál ba Francisco de Araújo, Thomas Freitas Martinho, Anacleto dos Santos, Mário Pereira da Costa, Adolfo Assunção de Jesus no Jaime Amaral Ximenes.
Indultu parsiál ba prizioneiru hodi hamenus pena fulan-neen (6) ba Elvis Hornai da Cruz, José Fernandes, Renato Hornai da Cruz no Tiago Soares Almeida.
Ba prizineiru Arminda Soares, Geremias Sequeira Andrade, Henrique dos Santos, Ivo Soares no José dos Santos hetan indultu parsiál ho metade pena.
Tuir artigu 85, alinea 1 hosi Konstituisaun Repúblika hateten katak Prezidente Repúblika de’it mak bele fó indultu ka hamenus kastigu, depoisde rona Governu ne’ebé konjuga ho artigu 3 no 4 Lei númeru 5/2016, 25 maiu.
Definisaun saida mak indultu no hamenus kastigu haktuir iha Kódigu Penál ne’ebé aprova ho Dekretu-Lei númeru 19/2009 no Lei númeru 15/2016 mak regula kondisaun no prosedimentu atu fó indultu ka hamenus kastigu, Prezidente Repúblika halo nia kompeténsia tuir de’it lei haruka.
Fó indultu no komutasaun ba pena ba prizioneiru sira nu’udar kompeténsia eskluziva Prezidente Repúblika nian tuir artigu 85 Konstituisaun no Kódigu Penál no Lei númeru 5/2016.
Ba krime organizadu, krime transnasionais, terorizmu, tráfiku umanu, korupsaun ativa maske kumpre tiha ona um tersu pena maibé lei bandu atu fó indultu. Ba krime sira ne’ebé la grave, hafoin kumpre um tersu pena, Prezidente Repúblika bele fó indultu ho razaun umanitária ninian.
Jornalista: Osória Marques
Editór: Cancio Ximenes
