DILI, 20 maiu 2021 (TATOLI)—Prezidente Sentru Lojíztika Nasionál (CLN, sigla portugés), Augusto Junior Trindade, hateten, daudaun foos iha armazen falta tonelada 18.400.
“Ita sei iha stock nasionál hamutuk 18.400, ne’ebé daudaun iha hela armazen. Tanba ne’e, ha’u hanoin ita laiha problema ba stock nasionál,” Prezidente CLN informa ba Agência TATOLI, via telefónika, kinta ne’e.
Nia dehan, bainhira iha pedidu ruma ba ajuda umanitária, parte CLN rasik disponível atu hasai foos iha armazen hodi halo intervensaun.
“Ami sempre disponível kuandu ministériu relante no entidade hakarak hato’o pedidu mai ami liuhosi Ministériu Koodernadór Asuntu Ekonómika (MKAE), ami sempre hasai foos,” nia akresenta.
Notísia relevante: Stock sasán laiha, SEPS suspende apoia vítima inundasaun iha Dili
Tanba ne’e, iha situasaun kalamidade ne’e, Prezidente CLN garante stock nasionál tanba foos iha armazen seidauk konta ho foos importasaun hosi setór privadu no produsaun agrikultór sira iha rai-laran.
“Ami garante laiha problema, kuandu situasaun hanesan ne’e nafatin tanba ita iha stock iha armazen,” nia argumenta.
Antes ne’e, iha agostu 2020, Governu liuhosi CLN halo akizisaun foos hosi Vietname ho kuantidade tonelada 30.000 ho kustu millaun $15, tanba iha situasaun emerjénsia ne’ebé kuaze nasaun hotu aplika serka sanitária no demanda konsumu nasionál a’as.
Aleinde ne’e, iha maiu nia laran ne’e, Ministériu Agrikultura no Peska (MAP) lansa époka dahuluk kolleta hare ektare 75 iha aldeia Helesu, suku atabae, postu administrativu Atabae, munisípiu Bobonaro.
Tuir dadus ne’ebé publika hosi MAP, kada tinan produsaun foos-rai hamutuk tonelada 34.272, ne’ebé kuantidade ne’e bele kobre ba fulan tolu de’it.
Enkuantu, tuir kálkulu ne’ebé publika hosi boletin seguransa ai-han, hatudu katak tinan-ida populasaun Timor-Leste nia konsumu nasionál hamutuk tonelada 139.000 no ba fulan-ida konsumu nasionál hamutuk tonelada 11.142
Jornalista: Natalino Costa
Editora: Julia Chatarina
