DILI, 24 maiu 2021 (TATOLI)–Autoridade Nasionál Komunikasaun (ANC, sigla portugés) atribui lisensa espektru frekuénsia adisionál ba operadór telekomunikasaun tolu ne’ebé opera iha Timor-Leste, hodi mellora asesu internet ba populasaun.
“Ohin ita halo atribuisaun espektru frekuénsia adisionál ba operadór sira iha banda 1.800 MHz, ne’ebé kada operadór ho 10 MHz, ne’e katak Timor Telecom hetan 10 MHz, Telemor 10 MHz no Telkomsel 10 MHz,” Prezidente ANC, João Olívio Freitas, informa iha salaun Caicoli, segunda ne’e.
Tuir Dirijente ne’e, objetivu atribuisaun adisionál ne’e atu fó atendimentu di’ak ba povu liuhosi rede Internet Service Provider (ISP).
“Téknikamente ninia implemetasaun ANC fó ba operadór sira hodi implementa iha terrenu, agora hosi parte ANC servisu hamutuk atu asegura implemetasaun no ezekusaun hosi utilizasaun frenkuénsia adisionál hodi labele hamosu interferénsia,” nia akresenta.
Hodi to’o faze ne’e, ANC konvoka enkontru dala-lima ho entidade relevante nune’e ezekusaun bele la’o ho di’ak.
Iha fatin hanesan, Ministru Transporte no Komunikasaun, José Agostinho da Silva, husu ba operadór telekomunikasaun tolu hodi implemeta servisu ho di’ak.
“Iha tempu badak ita sei haree rezultadu implementasaun hosi operadór tolu ein termu velosidade internet liuhosi atendimentu públiku,” governante ne’e dehan.
Nune’e mós, Diretór Engeñeria no Operasaun Timor Telecom, Francisco de Jesus Leite, hateten, parte operadór komprometidu implementa ho di’ak servisu sira no sei hatudu rezultadu iha fulan-juñu tinan ne’e.
“Servisu ne’e bele fasilita estudante sira ne’ebé ativu iha matéria online no mós ba utilizadór sira hotu,” nia subliña.
Antes ne’e, reuniaun Konsellu Ministru iha 27 janeiru 2021, Ministru José Agustinho, aprezenta opsaun polítiku-lejizlativa kona-ba alterasaun dahuluk Dekretu-Lei Númeru15/2012, loron 28 marsu, kona-ba Regulamentasaun Setór Telekomunikasaun no ba kriasaun regulamentu hosi atus regulasaun administrativa iha setór telekomunikasaun.
Opsaun hirak ne’e ho objetivu atu altera ka reformula solusaun anteriór balun ne’ebé eziste ona no klarifika konseitu tékniku no jurídiku balun inklui tipu prosedimentu regulatóriu sira, ne’ebé klasifika asaun ka omisaun sira ne’ebé sai nu’udar konduta, proibida no esklarese ninia sansaun administrativa sira.
Jornalista: Natalino Costa
Editora: Julia Chatarina
