iklan

NASIONÁL, HEADLINE, KAPITÁL

Governu planeia regula ró tradisionál

Governu planeia regula ró tradisionál

Ministru Transporte no Komunikasaun, José Agustinho da Silva. Imajen Tatoli/Egas Cristóvão

DILI, 24 maiu 2021 (TATOLI)—Ministériu Transporte no Komunikasaun (MTK) sei koordena ho Ministériu Agrikultura no Peska (MAP) no Sekretaria Estadu Peska (SEP), atu regula ró tradisionál halo viajen tula sasán no ema.

Tuir Ministru Transporte no Komunikasaun (MTK), José Agustinho da Silva, inisiativa ne’e tanba haree ba akontesementu foin lalais, ne’ebé ró ida halo viajen hosi Dili-Ataúro tula ema no sasán liu kapasidade hodi rezulta pasajeiru na’in-rua lakon vida no seluk lakon seidauk hetan.

“Durante ne’e akontese ró tradisionál sira kuandu atu la’o kalan ka loron, sira la’o daudaun, tanba sira uza ró privadu, entaun difikuldade ida ba autoridade mak atu kontrola, maibé ho situasaun ida-ne’e maka sei haree koordenasaun ho liña ministeriál sira atu kria instrumentu legál hodi regula,” Ministru José Agustinho, relata hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Notísia relevante: UPM-Navál kontinua buka mate-isin Nour ho Fransisco

Governante ne’e dehan, ró-ahi foin lalais hetan dezastre konsidera hanesan ró ba peskadór tradisionál no tama kategoria non solas, katak la’ós ba docking maibé ró-ahi tradisionál ne’ebé na’in mak populasaun, tanba ne’e SEP presiza kontrola maibé sei iha koordenasaun atu kria mekanizmu.

“Atu dehan ró peskadór ninia movimentu labele ba to’o tasi ne’ebé kle’an liu no la’ós uza tula sasán ho ema. Maibé situasaun sira ne’e akontese, ne’ebé sei iha koordenasaun atu regulariza,” nia akresenta.

Nune’e, MTK liuhosi Diresaun Nasionál Transporta Marítima, SEP, Polísia Nasionál Timor-Leste (PNTL) hosi Unidade Marítima sei koordena hodi kontrola ba movimentasaun ró tradisionál sira hodi evita asidente.

“Kuandu iha ona regra hodi regulariza maka sei prepara mós fasilidade ba seguransa nian. maski ró privadu maibé Governu tenke regula tanba nasaun ida iha ninia regra rasik,” nia subliña.

Jornalista: Antónia Gusmão.

Editora: Julia Chatarina

iklan
iklan

Leave a Reply

iklan
error: Content is protected !!