iklan

NASIONÁL, COVID-19, DILI, HEADLINE, LEI, SEGURANSA

PNTL sei investiga selebrasaun 20 maiu iha Masin-Lidun

PNTL sei investiga selebrasaun 20 maiu iha Masin-Lidun

Abitante 500-resin ne’ebé selebra loron restaurasaun independénsia ba dala 19, iha 20 maiu, ho kanta no dahur iha área Lagoa I, II no III Tasi-tolu, Dili. Imajen/facebook.

DILI, 24 maiu 2021 (TATOLI)—Polísia Nasionál Timor-Leste (PNTL), sei loke prosesu investigasaun ba abitante 500-resin ne’ebé selebra loron restaurasaun independénsia ba dala-19, iha 20 maiu, ho kanta no dahur iha área Masin Lidun, Tasi-tolu, Dili.

Komandante Operasaun Nasionál PNTL, Superintendente Xefe, Pedro Belo, konsidera asaun ne’e kontra regra Estadu Ermerjénsia, Serka Sanitária no Konfinamentu Domisiliáriu iha Dili.

Notísia relevante:Governu kansela selebrasaun loron restaurasaun 20 maiu

Tanba ne’e, parte Polísia Serbisu Investigasaun Kriminál Nasionál (PNSIK), hasai ona karta hodi bolu abitante-sira atu presta deklarasaun ba polísia.

“Agora daudaun ami halo prosesu investigasaun ba ema-sira ne’ebé viola regra durante Estadu emerjénsia hamutuk na’in 253, tanba ema-nia konsiénsia laiha no lakohi kumpre regra,” Pedro Belo hateten ba jornalista, iha Komandu Jerál PNTL, Caicoli, segunda ne’e.

Pedro Belo informa katak, PNTL sei kontinua halo sosializasaun ba regra sira iha sosiedade no husu atu sidadun hotu kumpre, labele halibur-malu barak nune’e hamutuk kombate COVID-19.

“Saúde ne’e iha ita-nia liman rasik, tenki kuidadu an, hanesan mós kuidade ita nia família no sosiedade,” nia alerta.

Antes ne’e, Portavóz Komandu Jerál PNTL, Superintendente Xefe, Arnaldo de Araújo informa, parte PNTL la hatene informasaun kona-bá abitante 500-resin ne’ebé lori bandeira RDTL, hodi selebra loron restaurasaun independénsia no virál iha rede sosiál.

Komandu PNTL Dili durante ne’e detein mós abitante na’in 37, tanba viola regra serka sanitária, hodi hala’o ezersísiu iha Tasi-ibun no hemu tua iha fatin públiku iha kapitál Dili.

Alende ne’e, PNTL aprezenta mós kazu festa iha Colmera iha Ministériu Públiku (MP), hodi prosesa tuir lei.

Entretantu, Rezolusaun Governu ba impozisaun konfinamentu domisiliáriu jerál ba ema hotu-hotu ne’ebé hela iha Munisípiu Dili, hahú hosi 13 maiu 2021, tenke hela iha uma ka iha alojamentu temporáriu, eseptu iha razaun forte, liuliu relasiona ho seguransa públika, serbisu no ba asesu sasán no serbisu ba nesesidade bázika.

Rezolusaun Governu kona-bá impozisaun konfinamentu domisiliáriu jerál, sita mós katak, autoridade polisiál fiskaliza kumprimentu ba regra ne’ebé hatuur ona iha Rezolusaun ne’e, aviza infratór-sira bainhira la kumpre Rezolusaun ne’e, konsidera prátika krime dezobediénsia.

Autoridade polisiál sei komunika ba Ministériu Públiku kona-bá identidade hosi ema ne’ebé, hafoin avizu ne’ebé prevee iha fraze anteriór no kontinua la respeita regra ne’ebé prevee ona iha Rezolusaun Governu.

Bainhira ema hosi estranjeiru la respeita  regra-sira ne’ebé prevee iha Rezolusaun Governu ne’e, autoridade polisiál sei komunika sira-nia identidade ba Serbisu Migrasaun.

Rezolusaun ne’e mós bandu movimentu transporte públiku iha área-sira hotu iha Munisípiu Dili, liuliu, mikrolete, taxi no anguna.

Bandu atividade relijioza ne’ebé implika ezisténsia ema halibur-malu. Ba efeitu Rezolusaun Governu ne’e, konsidera nu’udár ema halibur-malu  liu hosi na’in-rua, tenke iha distánsia fízika menus hosi metru rua.

Iha 18 maiu 2021, Governu liuhosi Ministériu Administrasaun Estatál (MAE) deside kansela selebrasaun loron restaurasaun independénsia ba dala-19, tanba serka sanitária no númeru kazu pozitivu COVID-19 ne’ebé aumenta hosi loron ba loron. 

Notísia relevante:PNTL sei kontrola abitante trata dokumentu iha arredór MSSI

Jornalista: Eugénio Pereira

Editór: Cipriano Colo

iklan
iklan

Leave a Reply

iklan
error: Content is protected !!