DILI, 26 maiu 2021 (TATOLI)—Ministériu Turizmu, Komérsiu no Indústria (MTKI) foku liu ba programa turizmu komunitáriu no garantia kréditu ba empreza sosiál, iha trimestre dahuluk tinan ne’e.
“Kona-ba programa turizmu komunitáriu, daudaun estabelese ona grupu traballu turizmu komunitáriu iha kada munisípiu atu halo indetifikasaun ba sentru turizmu komunitáriu hodi halo proposta mai Governu sentrál atu halo aprovasaun hodi bele prosesa ba infraestrutura bázika,” Ministru Turizmu, Komérsiu no Indústria, José Lucas do Carmo da Silva, informa iha edifísiu Ministériu Finansa, Aitarak-laran, kuarta ne’e.
Notísia relevante: MTKI estabelese grupu traballu turizmu komunitáriu iha suku Nunu-Mogue
Aleinde ne’e, MTKI hahú identifika fatin turíztiku no hahú halo reabilitasaun iha fatin balun hanesan ba Santuáriu Venilale no iha kapitál hahú prosesa atu realiza juventude jardinaje.
Antes ne’e, MTKI no Sekretaria Estadu Formasaun Profisionál no Empregu (SEFOPE) hahú halo diskusaun atu halo tranferénsia jestaun jere sentru turizmu komunitáriu hanesan Bee Manas Marabo, Bonaro, Rikiraka iha Viqueque, Com-Lautém no seluk tan.
“Ita diskute hela atu transfere jestaun ba MTKI atubele jere ho di’ak,” nia akresenta.
Kona-ba kréditu, parte MTKI no Banku Nasionál Komérsiu Timor-Leste (BNCTL, sigla portugés) halo ona tranférensia ba empreza sira ne’ebé submete proposta no liu ona avaliasaun.
Notísia relevante: MTKI avalia proposta empreza asesu fasilidade garantia kréditu 3%
“Programa ida-ne’e mak foin halo, maibé ba programa seluk sei iha prosesu aprovizionamentu,” nia hatutan.
Iha sorin seluk, ezekusaun Orsamentu Jerál Estadu (OJE) 2021 hosi parte MTKI iha trimestre dahuluk atinje 11,7%.
“Ita iha períodu defísil ne’e, tanba enfrenta hela situasaun COVID-19 no inundasaun, ezekusaun orsamentu ba trimestre dahuluk atinje ona 11,7% ,” governante ne’e dehan.
Ezekusaun ne’ebé sei kiik tebes, Ministru orienta ona kada diresaun atu ezekuta tuir programa no planu ne’ebé orsamenta ona iha tinan ne’e.
Totál orsamentu ba MTKI ba tinan ne’e hamutuk $11.801.657, ne’ebé fahe ba kategoria saláriu no vesimentu $1.664.280, bens no servisu $7.283.770, tranferénsia públika $2.468.000, kapitál menór $385.600 no kapitál Dezenvolvimentu laiha.
Montante ne’e inklui $2.185.000 atubele implementa atividade relasiona ho medida planu rekuperasaun ekonómika
Jornalista: Florêncio Miranda Ximenes
Editora: Julia Chatarina
