DILI, 26 maiu 2021 (TATOLI)–Ministru Obra Públika (MOP), Salvador Soares dos Reis Pires no Prezidente Konsellu Administrasaun Bee Timor-Leste, Empreza Públika (BTL, E.P), Carlos Peloi dos Reis, aprezenta projetu rekuperasaun infraestrutura iha Dili.
“Projetu melloria infraestrutura hanesan drenajen no saneamentu iha Dili hakarak fó resposta ba problema inundasaun no haree ba atuál kapasidade drenajen insufisiente inklui falta manutensaun,” Ministru Prezidénsia Konsellu Ministru, Fidelis Manuel Leite Magalhães, informa hafoin ramata reuniaun ezekutivu iha salaun Ministériu Finansa, Aitarak-laran.
Projetu ne’e sei aumenta kapasidade infraestrutura sira ne’ebé eziste no sei konstrui basia retensaun iha fatin estratéjiku sira, nune’e bele kontrola velosidade bee iha kazu udan-boot.
Projetu drenajen no saneamentu iha kanál inkonsta ne’ebé dezvia bee tun hosi foho iha Manleuana bá mota Comoro no konstrui barreira atu satan bee hosi área Vila-verde ba mota Maloa inklui dezvia mós bee iha Mascarinhas ba mota My Friend, Balide no fatin seluk tan.
Kustu estimasaun planu mestre ba implementasaun projetu drenajen no sanemeantu ne’e hamutuk millaun $300 resin, ne’ebé parte Millennium Challenge Corporation MCC sei kontribui fundu millaun $200 resin.
Aleinde ne’e, ekipa hosi liña ministeriál no MCC forma ona ekipa traballu atu tau-matan ba levantamentu dadus no implementasaun projetu.
Jornalista: Antónia Gusmão
Editora: Julia Chatarina
