DILI, 28 maiu 2021 (TATOLI)—Provedoria Direitu Umanu no Justisa (PDHJ sígla portugés), hato’o ona auto-notísia krime ba Ministériu Públiku (MP), kona-bá kazu membru Polísia Nasionál Timor-Leste (PNTL) halo agresaun fízika hasoru Octavio Thal, ne’ebé faan nú iha pontu entrada Tasi-tolu, Dili, domingu (23/05).
“Auto-notísia krime, ita hato’o tiha ona horisehik ba Prokuradoria Jerál Repúblika, hodi bele loke prosesu tuir-mai,’’ Provedora PDHJ, Jesuina Maria Ferreira Gomes, hateten ba jornalista Agência Tatoli via whatsAap, sesta ne’e.
Notísia relevante:Membru PNTL baku Octavio Thal submete ba investigasaun
Provedora hatutan, PDHJ rekolla ona informasaun-sira kona-bá akontesimentu ne’e no hato’o ona ba MP hodi rejista, tanba MP hanesan na’in ba asaun penál bele loke prosesu tuir-mai.
PDHJ mós haruka ona karta ba Primeiru Ministru (PM), nu’udár Ministru Interiór ba akontesimentu ne’e no mós ba Komandu Jerál PNTL.
Iha karta ne’e PDHJ rekomenda atu instaura prosesu disiplinár no foti medida kautelár hodi suspende membru ne’e durante prosesu investigasaun, bazeia ba dekretu-lei númeru 44/2020, loron 7 outubru, ne’ebé aprova regulamentu disiplina PNTL.
Jornalista: Nelson de Sousa
Editór: Cipriano Colo
