DILI, 28 maiu 2021 (TATOLI)—Tuir dadus hosi Sala Situasaun, Sentru integradu Jestaun Krize (CIGC, sigla portugés) liuhosi Komisaun Interministeriál ba Vasina Kontra COVID-19, hatudu katak to’o sesta (28/05) ne’e rejista ona sidadaun hamutuk 76.683 mak simu ona vasina AstraZeneca.
“Hahú hosi lansamentu faze dahuluk iha loron 07 abríl to’o 28 maiu, hatudu katak timor-oan ne’ebé simu ona vasina AstraZeneca iha faze doze dahuluk hamutuk 76.683,” Portavóz CIGC, Odete Viegas, relata iha sala plenária Parlamentu Nasionál, sesta ne’e.
Notísia relevante: Governu deklara sidadaun simu vasina kompleta livre sirkulasaun sein teste
Iha faze dahuluk ho doze 24.000 hosi COVAX Facility, implementa iha territóriu nasionál hahú iha loron 07 to’o 30 abríl no konsege vasina ema 28.669, ne’ebé hosi persentajen ne’e barak liu mane 67% no feto 33%.
“Ita hatene mós iha planu vasina faze dahuluk ne’e, maibé ita esklui hela inan isin-rua no inan fó susu, no fó prioridade ba liña frente, komorbilidade, tinan 60 ba leten no seluk tan,” nia akresenta.
Nune’e mós, implementa faze daruak vasina doze dahuluk, ne’ebé hetan apoia hosi Governu Austrália hamutuk doze 20.000.
“Ita hetan ona apoia hosi Austrália hamutuk doze 40.000, ne’ebé ita implementa hosi loron 10 to’o 28 maiu, ne’ebé atinje ona iha munisípiu Dili hamutuk ema na’in-48.014 ,” nia informa.
Vasina doze daruak faze dahuluk hahú 12 to’o 28 juñu
Aleinde ne’e, Governu Austrália ohin apoia tan vasina AstraZeneca doze 20.00, ne’ebé sei hahú implementa fulan-jullu.
Portavóz CIGC dehan, iha semana oin, Governu Timor-Leste sei hatama tan vasina AstraZeneca hosi COVAX Facility ho doze 100.800, atu hahú vasina doze daruak iha 12 juñu no termina iha 28 juñu.
Totál doze 100.800, mai hosi COVAX Facility hamutuk doze 76.800 no Governu Nova Zelándia doze 24.000.
Nune’e, Governu liuhosi Ministériu Saúde halo esforsu estabelese ekipa iha kada munisípiu no suku to’o aldeia sira, hodi halo vasinasaun ba komunidade sira ne’ebé seidauk hetan doze dahuluk no vasina ba doze daruak.
“Ba oin, ami sei habelar liután vasina liuhosi ekipa traballu, nune’e iha fulan juñu ita bele alkansa mais metade populasaun iha Dili no terrítoriu Timór laran bele hetan ona vasina,” nia subliña.
Jornalista: Florêncio Miranda Ximenes
Editora: Julia Chatarina
