DILI, 30 maiu 2021 (TATOLI)–Governu liuhosi Ministériu Petróleu no Minerál (ANPM) hahú estabelese estatutu empreza estatál iha setór mineiru hodi rekolla reseita alternativu ba kofre Estadu.
“Lei Kódigu Mineiru aprovadu atu hahú loke diskusaun estabelese empreza estatál ba mineiru, maibé ita sei kontinua de’it empreza estatál Murak Rai Timor, SA atu sai hanesan Timor GAP, nune’e bele rekolla retornu ba Estadu,” Ministru Petróleu no Minerál, Víctor da Conceição Soares, iha edifísiu Ministériu Finansa, Aitarak-laran, domingu ne’e.
Notísia relevante: MPM sei kontinua planu harii empreza Murak Rai Timor
MPM deside avansa ho planu ne’e ho razaun Parlamentu Nasionál (PN) aprova ona Lei Kódigu Mineiru, ne’ebé presiza iha empreza estatál Timór iha área minerál atu Estadu bele investe no fó fali retornu.
Tuir Ministru, empreza ne’e sei permite Estadu opera setór mineiru, ne’ebé garante no dezenvolve setór rekursu minerál atu sai fonte rendimentu nasionál no aumenta empregu ba sidadaun sira.
“Ita-nia empreza estatál ne’e nia ezbosu preparadu ona. Ami planu atu kria tan ekipa task force ida atu halo diskusaun estabelesementu empreza estatál,” nia akresenta.
Notísia relevante: Governu Aprova Dekretu Lei Atividade Kompañia Murak Rai Timor, SÁ
Iha tinan 2017, Governu liuhosi reuniaun Konsellu Ministru aprova proposta dekretu lei ne’ebé aprezenta hosi Ministru Estadu no Ministru Rekursu Minerál, Mariano Asanami Sabino (VII Governu) kona-ba estatutu kompañia Murak Rai Timór, SA, hodi hala’o atividade.
Inisiativa ne’e ho objetivu atu realiza atividade minerál atu halo prosesu refinasaun inklui komersializasaun rekursu públiku.
Harii instituisaun Estadu ida ne’ebé garante dezenvovlimentu setór ekonómiku ho nia potesiál boot kontirbui ba diversifikasaun ekonómika tama iha estratejia Governu.
Nune’e, hanesan instituisaun Estadu seluk, faze dahuluk Governu prevee osan hamutuk $400.000 hodi ajuda dezenvolvimentu iha prosesu diversifikasaun reseita iha futuru.
Jornalista: Florêncio Miranda Ximenes
Editora: Julia Chatarina
