DILI, 01 juñu 2021 (TATOLI)—Eis Prezidente Repúblika, José Ramos Horta, lamenta no rejeita informasaun ne’ebé dehan simu vasina bele halo ema mate.
“Balun hateten simu vasina bele mate, ne’e bosok. Loos duni simu vasina ohin bele mate, maibé mate tanba asidente, stroke la’ós tanba diretamente vasina, iha balun simu vasina ne’e reasaun maka’as tebes, ne’e akontese normál, signifika imunidade sei forte loos,” Horta hateten hafoin hala’o enkontru ho Primeiru-Ministru (PM), Taur Matan Ruak, iha Rezidénsia Farol, tersa ne’e.
Notísia relevante: Horta enkoraja sidadaun hotu simu vasina AstraZeneca
Tanba ne’e, nia enkoraja populasaun hotu simu vasina, nune’e bele proteje-an hosi COVID-19 no halo atividade normál filafali.
“Ha’u hateten ba populasaun tomak atu proteje rai no povu ida ne’e, tanba ne’e ema hotu tenke vasina,” nia subliña.
Tuir Horta, nasaun ne’ebé mak deside apoia vasina mai Timor-Leste la’ós atu halimar no lakon tempu.
Nia mós nota, ema iha rai seluk buka vasina, maibé iha Timor-Leste kontráriu iha ema balun mak halo kampaña kontra vasina.
“Ha’u apelu ba sira ne’ebé rejeita simu vasina, ha’u simu ona vasina no tempu badak atu halo segunda doze, iha mundu ne’e hanesan Amérika sira vasina ona populasaun to’o 70%. Ema iha rai seluk buka vasina, maibé ita iha Timór halo kampaña hodi kontra, ne’e ha’u la hatene sira-nia intensaun saida ka laiha informasaun maibé informasaun ha’u fahe bebeik no ha’u hateten ba populasaun bainhira Governu anunsia kampaña vasinasaun favór ba simu vasina,” Horta fó hanoin.
Notísia relevante: Sidadaun 76.683 simu ona vasina AstraZeneca doze dahuluk
Doze daruak sei reforsa liután imunidade tanba ne’e, ba sira ne’ebé simu ona doze dahuluk tenke kompleta doze daruak.
“Doze dahuluk no segundu mak bele halo vasina ne’e proteje to’o 90%,” nia tenik.
Tanba ne’e, eis Xefe Estadu ne’e halo enkontru ho Xefe Governu hodi ko’alia liután kona-ba vasina ne’ebé mak implementa ona iha Timór.
“Ha’u halo audiénsia ho Primeiru-Ministru kona-ba vasina tanba ha’u mós buka koordena ho nasaun seluk atu mobiliza vasina mai Timór, nune’e bele susesu kombate pandemia ne’ebé númeru infetadu sa’e boot tebes iha Timor-Leste,” nia hatutan.
Nune’e, atu evita no redús, Governu presiza aselera vasina tanba pandemia ne’e maka’as tebes iha nasaun sira hanesan Índia, Nepal no agora mós Malázia.
“Informasaun ne’ebé iha Malázia agora maka’as liután Índia no nasaun ne’e besik loos ita, ne’e duni tenke aselera vasina,” nia akresenta.
Maski nune’e, Líder nasionál ne’e apresia ho serbisu Ministériu Saúde, ne’ebé mak aselera vasina kada loron bele fó vasina ba populasaun to’o 4.000.
Jornalista: Antónia Gusmão
Editora: Julia Chatarina
