DILI, 01 juñu 2021 (TATOLI)—Komisaun A ne’ebé trata asuntu Justisa no Konstitusionál ho Ministériu Administrasaun Estatal (MAE) hahú halo apresiasaun inisiál ba projetu-lei eleitorál munisipál, projetu-lei podér lokál no dezentralizasaun administrativa.
Komisaun A halo audiénsia públika ho Ministru Administrasaun Estatal (MAE) hodi halo apresiasaun inisiál ba projetu-lei eleitorál munisipál, projetu-lei podér lokál no dezentralizasaun administrativa.
Notísia Relevante: Desentralizasaun Administrativa tama ona faze deskonsentrasaun territoriál
“Projetu-lei hirak ne’e inísia hosi Parlamentu Nasionál entaun Komisaun A hakarak rona Governu nia hanoin. Projetu-lei eleitorál ne’e ko’alia kona-ba órgaun podér lokál ne’ebé povu mak hili tantu asembleia munisipál no prezidente autoridade munisípiu sira. Nune’e mós projetu-lei podér lokál ne’e atu hakbesik serbisu públiku sira hosi estadu ba kraik ka fó podér ho kompeténsia tomak ba munisípiu sira halo planu, programa no orsamentu rasik,” Ministru Administrasaun Estatal, Miguel Pereira de Carvalho, hateten ba ornalista sira, iha Parlamentu Nasionál, tersa ne’e.
Nia hatutan, projetu-lei desentralizasaun administrativa ne’e previstu atu Governu Sentrál halo transferénsia kompeténsia ka fó podér ba munisípiu sira no atribui kompeténsia balu ne’ebé durante ne’e seidauk fó ba Governu munisipál.
Tanba atu estabelese podér lokál ne’e mandatu konstitusionál ne’ebé temi iha artigu 72 Konstituisaun RDTL katak tenke iha podér lokál atu nune’e hakbesik serbisu públiku ne’e ba ita-nia populasaun sira ho forma mais efisiente no efikásia.
Bainhira munisípiu sira iha ona podér lokál entaun sei promove dezenvolvimentu rurál, promove partisipasaun demokrátika ba populasaun sira iha área rurál.
Ministru Administrasaun Estatal ne’e apresia ho inisiativa Parlamentu Nasionál nian tanba hakbesik serbisu públiku ba munisípiu sira importante no espera Parlamentu Nasionál bele aselera projetu-lei hirak ne’e.
Maibé, nia dehan, to’o iha debate espesialidade Governu sei propoin atu halo alterasaun artigu balun iha projetu-lei hirak ne’e, nune’e implementasaun iha futuru labele hamosu problema.
Jornalista: Evaristo Soares Martins
Editór: Cancio Ximenes
