DILI, 01 juñu 2021 (TATOLI)—Reprezentante povu iha uma fukun Parlamentu Nasionál (PN) kontinua ezije Governu atu buka-tuir saudozu Nicolau Lobato no saudozu sira seluk nia ruin ne’ebé lakon vida iha prosesu luta ba libertasaun nasionál.
Notísia Relevante: Mandati husu Indonézia hatudu Nicolau Lobato nia ruin
Deputadu Bankada Frente Revolusionária Timor-Leste Independente (FRETILIN), David dias Ximenes “Mandati” husu ba Governu atu ko’alia ho autoridade Jakarta-Indonézia hodi hatudu restu mortál hirak ne’e.
Ohin loron sidadaun Indonézia sira mai buka sira-nia restu mortál iha Timor-Leste entaun oportunidade ida-ne’e Governu Timor-Leste mós tenke ejize atu hatudu restu mortál hosi Timor-Leste nian ne’ebé to’o agora seidauk hetan.
“Ha’u husu beibeik ona maibé dehan katak ko’alia ona. Ha’u hein to’o agora seidauk iha resposta ida (hosi Governu). Hanesan uluk eis komandante Yunus ho komandante pelotaun Nanggala nian mak ohin Ministru Defeza Nasionál Indonézia nian, karik bele sira ajuda ita hodi buka ita-nia maluk sira hanesan Nicolau Lobato nia ruin ne’e,” Deputadu Mandati ko’alia iha Parlamentu Nasionál.
Mandati husu Governu liuhosi Ministériu Negósiu Estranjeiru no Kooperasaun (MNEK) atu esforsu ko’alia sériu ho Governu Indonézia, tanba sasin balun ne’ebé akompaña operasaun iha Timor balun mate ona no oras ne’e hela ema na’in-rua.
Entrenatu Vise-Xefe Bankada Partidu Libertasaun Populár (PLP), Deputadu Francisco de Vasconcelos, hateten uma fukun ejize dalabarak ona maibé to’o agora laiha solusaun.
“Ita iha Timor mak iha fukun ruma iha ne’e karik, Veteranu sira kompletu iha Parlamentu ne’e, maibé sé parlamentu presiza enkuandramentu legál ruma, ita halo, ema sira-ne’e idade tán, sei la rezolve ema sira-ne’ebé mate no lakon tiha de’it,” nia dehan.
Antes ne’e Komisaun Akollamentu Verdade no Rekonsialiasaun (CAVR-sigla portugés) ko’alia barak kona-ba rekonsiliasaun no Komisaun Verdade no Amizade (CVA, sigla portugés) ko’alia kona-ba amizade entre Timor-leste ho Indonézia.
“Ha’u reseiu uituan maibé amizade ne’e mak taka tiha verdade ne’e karik, tanba tinan 20 tiha ona. Se iha harii komisaun barak para prodús de’it relatóriu, maibé ita-boot sira ka’er medalla barak mós deve hela sira-ne’ebé mate ne’e,” nia hateten.
Vise-Xefe Bankada PLP propoin ba Parlamentu Nasionál hasai rezolusaun hodi obriga Governu buka-tuir.
Jornalista: Evaristo Soares Martins
Editór: Cancio Ximenes
