DILI, 02 juñu 2021 (TATOLI)—Governu liuhosi reuniaun Konsellu Ministru (KM) iha kuarta ne’e, aprova Projetu Dekretu-Lei kona-ba kriasaun suplementu remuneratóriu ba traballadór iha administrasaun públika, ne’ebé halo atividade profisionál ho kondisaun direta iha servisu prevensaun ka kontrolu COVID-19.
Projetu Dekretu-Lei ne’e aprezenta hosi Ministru Finansa, Rui Augusto Gomes.
“Valór suplementu remuneratóriu ne’e sei estabelese liuhosi Rezolusaun Governu no bele muda tuir grau risku ne’ebé traballadór sira ne’e hasoru iha terrenu,” Ministru Prezidénsia Konsellu Ministru, Fidelis Manuel Leite Magalhães, informa hafoin reuniaun ezekutivu, iha salaun auditóriu Ministériu Finansa, Aitarak-laran.
Notísia relevante: Reuniaun KM: Governu define valór suplementu remuneratóriu ba ajente administrasaun públika
Enkuantu, Projetu Dekretu-Lei ne’e sei prodúz efeitu, hahú iha loron 01 abríl 2021.
Maski proposta ne’e hetan ona aprovasaun, maibé seidauk fixa montante hira mak sei atribui, maibé atu permite Governu aprezenta filafali regulamentu ruma hafoin bele atribui montante tuir risku ne’ebé traballadór sira hetan.
Antes ne’e, iha tinan kotuk Governu estabelese ona suplementu remuneratóriu ba traballadór elijivel ho prestasaun atividade profisionál iha servisu prevensaun no kontrolu COVID-19, hanesan médiku, forsa, polísia, tékniku eletrisidade, jornalista no seluk tan, ho remunerasaun la hanesan, depende risku servisu ne’e rasik.
Jornalista: Antónia Gusmão
Editora: Julia Chatarina
