MESSK sei atribui bolsa estudu foun ba dosente 50 hosi IESP
DILI, 02 juñu 2021 (TATOLI) – Ministériu Ensinu Superiór, Siénsia no Kultura (MEESSK), tinan ne’e, sei atribui bolsa estudu foun ba dosente na’in-50 hosi Instituisaun Ensinu Superiór Privadu (IESP).
Notísia Relevante : MESSK sei haruka dadus estudante 63,523 ba MF
Ministru Ensinu Superiór, Siénsia no Kultura, Longuinhos dos Santos, relata katak mehi-boot VIII Governu nian atu apoiu bolsa estudu ba dosente-sira ne’e tanba hakarak hadi’a kualidade iha instituisaun ensinu superiór privadu-sira.
“Bolsa estudu foun ba dosente na’in-50 hosi Instituisaun Ensinu Superiór Privadu ne’e sei hahú uluk ho formasaun sientífika ida,” Ministru Longuinhos dos Santos, haktuir ba jornalista-sira iha Edifísiu Ministériu Finansas, Dili, kuarta ne’e.
Nia esplika, formasaun sientífika ne’e atu reforsa kapasita dosente-sira nian hodi apoiu planu no programa IESP nian iha peskiza sientífiku. Tanba formasaun sientífika ne’e maka sei sai xave ida atu hasa’e kualidade rekursu umanu iha Instituisaun Ensinu Superiór Privadu-sira.
Longuinhos afirma mós formasaun ne’e hanesan dalan ida hodi refleta lema ensinu superiór nian katak kualidade iha formasaun mak sei lori futuru nasaun nian ba oin.
Jornalista : Tomé Amado
Editór : Francisco Simões
