DILI, 02 juñu 2021 (TATOLI)--Governu Timor-Leste hamutuk ho Austrália sei selebra akordu kontribuisaun finanseira ba reziliénsia komunitária iha ámbitu COVID-19.
“Konsellu Ministru aprova autorizasaun selebra akordu ida hosi Ministru Finansa, Rui Augusto Gomes, entre Governu Timor-Leste no Austrália, relativu ho kontribuisaun finanseira direta ida hodi apoia reziliénsia komunitária no rekuperasaun ekonómika iha Timor-Leste durante pandemia globál COVID-19,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha salaun Ministériu Finansa, Aitarak laran, kuarta ne’e.
Notísia relevante: Austrália iha kompromisu apoia millaun AU$7 ba Timor-Leste
Tuir governante ne’e, Governu Austrália sei realiza kontribuisaun finanseira direta ida ho valór millaun AU$20 ka besik millaun US$15,5, hodi fó apoia ba komunidade sira no hadi’a infraestrutura sira liuhosi Programa Nasionál Dezenvolvimentu Suku (PNDS) no orsamenta no implementa projetu Bolsa da Mãe Jerasaun Foun.
Antes ne’e, iha maiu 2020, Governu Austrália entrega apoiu millaun $ 4,6 hodi apoiu PNDS, ne’ebé benefisia suku 150, hodi harii infraestrutura bázika hanesan irigasaun, bee moos, klínika no seluk tan.
Enkuantu, projetu Bolsa da Mãe implementa hosi Ministériu Seguransa Sosiál no Inkluzaun (MSSI) ho objetivu atu redúz má nutrisaun, redúz pobreza iha Timor-Leste, ne’ebé ho nia alvu ba inan isin-rua inklui bebé idade zero to’o loron 1.000.
MSSI sei fó ba inan isin-rua hamutuk $15 kada fulan, bebé moris-mai $20, no bebé ne’ebé moris-mai ho kondisaun defisiente sei aumenta-tan $10 sai $30, tanba bebé defisiente nesesidade boot-liu kompara ho bebé ne’ebé moris-mai ho kondisaun normál.
Programa subsídiu bolsa da mãe ne’ebé agora daudaun iha, hahú implementa iha 2012 atu sustenta família vulnerável ho kada benefisiáriu, fulan ida simu $5 no tinan ida $60, maibé família ida labarik na’in-tolu mak rejista, entaun totál tinan ida $180.
Tuir dadus hosi MSSI, oras ne’e daudaun benefisiáriu bolsa da mãe iha territóriu hamutuk 47.539.
Jornalista: Antónia Gusmão
Editora: Julia Chatarina
