VIQUEQUE, 07 juñu 2021 (TATOLI)-Ekipa Ministériu Ensinu Superiór, Siénsia no Kultura (MESSK), segunda ne’e, hala’o sensibilizasaun kona-bá padraun lisensiamentu operasionál Instituisaun Ensinu Superiór nian ba autoridade-sira Munisípiu Viqueque nian iha Viqueque.
Padraun lisensiamentu Ensinu Superiór ne’e ho baze despaixu ministeriál númeru 090/GMMESKK/II/2020. Nune’e, Paulo Mariano, nu’udar ekipa sensibilizasaun hosi MESSK, klarifika katak sensibilizasaun ne’e parte ida atu habelar informasaun kona-ba kadernu padraun lisensiamentu operasionál ba Instituisaun Ensinu Superiór ba autoridade Munisípiu Viqueque atu bele iha koñesimentu.
“Ita iha esperiénsia, hafoin Timor-Leste restaura nia independénsia iha 20 maiu 2002, ema barak mak hakarak loke universidade no nian liras ka klase paralelu to’o iha munisípiu sira inklui iha Viqueque, mak hanesan Universidade de Dili (UNDIL), Institute of Business (IOB) no Institutu Superiór Cristal (ISC), maibé la’o to’o dalan klaran mate hotu ona,” Paulo Mariano, afirma.
Dadus ne’ebé MESSK iha katak foin lalais UNDIL, ISC, IOB no mós UNITAL atu loke tan klase paralelu iha Postu Administrativu Uatulari, maibé sira la prienxe rekizitu hosi MESSK nian, dala ruma sira iha limitasaun ba finanseiru no rekursu umanu tan ne’e sira taka klase paralelu sira iha munisípiu Viqueque.
Nia hateten, MESSK halo padraun lisensiamentu operasionál ba Ensinu Superiór-sira hanesan mata dalan ida no bele regula ensinu superiór sira.
“Karik ema ruma iha intensaun hakarak loke instituisaun superiór karik, ita iha baze legal ruma, ne’ebé atu regula sira iha futuru, nune’e labele difikulta ita, liuliu ba dezenvolvimentu Timor-Leste nian,” Paulo Mariano realsa.
Iha padraun lisensiamentu operasionál ba instituisaun ensinu superiór nian vizaun mak konsolida sistema ensinu superiór ne’ebé luan no integradu no regula padraun ho kualidade ne’ebé rigorozu. Hodi oferese universidade ruma karik tenke parseria ho setór privadu sira no liga mós ba merkadu servisu no mós hetan koñesimentu hosi parseria ho nasaun seluk ne’ebé sai kompetitivu iha área edukasaun.
Prezidente Autoridade Munisipál Viqueque, Januario Soares ‘Bolly’ hatutan, eventu ne’e oportunidade di’ak ida hodi rona padraun lisensiamentu instituisaun ensinu superiór-sira nian ne’ebé hosi MESSK.
Nia hatutan, liuhusi sensibilizasaun ne’e bele hatene padraun sira ne’ebé atu regula universidade sira no garante ba kualidade edukasaun.
“Ita hatene iha Munisípiu Viqueque klase paralelu hanesan hosi UNDIL, IOB no ISC ikus mai taka, maibé ita mós presiza hatene padraun lisensiamentu atu ita bele harii ensinu superiór hodi la’o tuir lei ne’ebé mak iha,” Januario akresenta.
Partisipa iha sensibilizasaun ne’e diretór edukasaun Munisípiu Viqueque Emidio Amaral, Administradór Postu Ossu, Agustinho de Sousa, Administradór Postu Viqueque, Antonio Gregório, funsionáriu edukasaun sira iha Munisípiu Viqueque no organizasaun naun governmental (ONG) Raes Hadomi Timor-Oan (RHTO).
Jornalista : Vitorino Lopes da Costa
Editór : Francisco Simões
