VIKEKE, 10 Jullu 2026 (TATOLI)—Prezidente Autoridade Munisípiu (PAM) Vikeke, Francisco C. S de G. Soares, introdús polítika desentralizasaun no podér lokál ba populasaun Postu Administrativu Lakluta.
“Ita hakarak komunidade entende desentralizasaun no podér lokál ne’ebé iha,” Francisco ba jornalista sira iha Salaun Parókia Lakluta, Sesta ne’e.
Nia esplika desentralizasaun no podér lokál la’ós de’it estrutura administrativa, maibé hanesan mekanizmu ida atu fó ema direitu no responsabilidade atu dezenvolve komunidade.
Programa referidu, Francisco haktuir, antes ne’e hahú ona iha Suku Maluru no Suku Uaimori no agora kontinua iha Postu Lakluta iha-ne’ebé partisipa husi autoridade komunitária husi suku haat hanesan Dilór, Ahik, Laline no Uma-Tolu.
Notísia relevante: Ekipa MAE avalia kondisaun Autoridade Vikeke ba desentralizasaun no podér lokál
Iha fatin hanesan, Administradór Postu Lakluta, Pascoal Gama Martins, hato’o agradesimentu ba Autoridade Munisípiu Vikeke ne’ebé hakat mai Postu Administrativu Lakluta hodi tranzmite polítika desentralizasaun no poder lokál ba populasaun.
“Ami hato’o agradesimentu ba Autoridade Munisípiu Vikeke ne’ebé bele mai introdús polítika desentralizasaun no poder lokál nian ba ami-nia populasaun. Ha’u hanoin liuhusi atividade sira-ne’e bele motiva liután ita-nia populasaun sira ba prorgesu dezenvolvimentu sira-ne’ebé la’o iha Munisípiu Vikeke,” nia tenik.
Tuir dadus, populasaun Postu Lakluta iha 9.827, totál aldeia hamutuk 20 no suku hamutuk haat mak hanesan Dilór, Ahik, Laline no Uma-Tolu. Enkuantu, Postu Lakluta iha área luan hamutuk 416,54 km².
Entretantu, marka prezensa iha sorumutu ne’e kompostu husi autoridade lokál, Komandante Polísia Nasionál Timor-Leste (PNTL) Eskuadra Lakluta, Diretór Servisu Munisipál no Xefe Departamentu Servisu Munisipál, Delegasaun Territoriál, Padre Parókia Santu António Lakluta, Xefe Suku Ahik, Dilór, Laline no Uma-Tolu ho Konsellu Suku no Komunidade Postu Lakluta.
Jornalista: Vitorino Lopes da Costa
Editór: Xisto Freitas da Piedade
