DILI, 07 juñu 2021 (TATOLI)- Movimentu Universitáriu Timor-Leste (MUTL) husu ba Ministériu Interior (MI) no Komandu Jerál Polísia Nasionál Timor-Leste (PNTL) atu demite ajente Polísia ida ne’ebé lori pistola tiru-mate veteranu Mateus de Deus “Amino” ho nia oan-mane Camilio de Deus iha Aldeia Ainitas-hun, Suku Lahane Osidentál, Postu Administrativu Vera Cruz, Munisípiu Dili, sábadu madrugada (05/06/2021).
Notísia Relevante : Matebian Mateus ho nia oan-mane haloot ona iha semitériu Becusse
Liuhosi konferénsia imprensa, segunda ne’e, iha Liceu, Universidade Nasionál Timor Lorosa’e (UNTL), portavós MUTL, Denis Saebaku, ezije mós ba MI ho Komandu PNTL atu halo reforma ba sistema PNTL tanba beibeik ona maka ajente-sira PNTL nian envolve iha kazu violasaun direitu umanu.
Kazu violasaun grave ba direitu umanu ne’ebé envolve hosi ajente-sira PNTL hodi rezulta Timor-oan balun lakon vida, hahú kedas iha insidente Kulu-hun iha loron 18 novembru 2018.
Iha insidente Kulu-hun ne’e, juventude na’in-tolu lakon vida, hanesan Luis Cavin Saldanha (18), Leonaldino Eduardo Ximenes (20) ho Eric Joni Ribeiro (20).
Iha mós vítima na’in-lima ne’ebé hetan kanek todan iha insidente Kulu-hun ne’e maka hanesan, Teresinha Vila Nova (23), Agrefino da Costa (19), Pinto Gama (25), Paulino de Jesus (36) no Lúcio do Carmo (30).
Iha insidente ne’e, Tribunál Distritál Dili (TDD) foti desizaun final hodi aplika pena kumulativu ba kondenadu Ajente Polísia José Alves Pereira, tinan-25 prizaun, no ba kondenadu Francisco Maria de Sousa ho pena prizaun tinan-20.
“Ami ezije ba Ministériu Interiór reforma sistema PNTL nian, se lae PNTL rasik mak sei hamonu Estadu RDTL ninia dignidade ne’ebé ita sosa ho raan no ruin,” portavós MUTL, Denis Saebaku, afirma tan liuhosi konferénsia imprensa ne’e.
MUTL ezije mós ba Ministériu Interiór no Komandu Jerál PNTL atu aselera investigasaun hasoru ho ajente polísia ne’e lalais tanba MUTL konsidera krime ne’ebé ajente polísia halo kontra violasaun direitu umanu no viola Konstituisaun RDTL iha artigu 147 ne’ebé iha aliña rua, hateten katak Prevensaun Kriminál tenke hala’o ho respeitu ho direitus umanu.
Nia hatutan, haree ba situasaun membru PNTL ne’ebé ikuikus ne’e sempre lori arma ameasa povu to’o habadak povu-nia moris mak MUTL ezije Komandu Jerál PNTL tenke fó orden ba kada membru hotu ne’ebé servisu antes fila ba uma tenke rai armas seguransa nian iha ninia-fatin.
MUTL husu Ministériu Interiór no Komandu Jerál PNTL bainhira iha tan prosesu rekrutamentu ba membru foun tenke fó prioridade liubá sidadaun sira ne’ebé iha nivél Ensinu Superiór ne’ebé mai ho grau akadémika Lisensiatura.
“Ami husu ba Polítiku na’in sira, liu-liu ba Parlamentu Nasional (PN) tenke prodús lei ida kona-ba sirkulasaun bebida alkólika, nune’e bele redús kazu konflitu orizontál entre joven-sira iha territóriu Timor laran tomak, tanba daruma konflitu ne’ebé mosu iha fatin-fatin kauza ida mak joven barak konsumu alkólika,” nia tenik.
MUTL mós husu ba organizasaun independente-sira hotu atu nafatin akompaña kazu Lahane to’o hetan solusaun no justisa ida loloos ba suspeitu.
“Karik ba oin kazu sira ne’e Governu la tau konsiderasaun imediata, mak ami mós komprometidu katak ami sei organiza Ensinu Superiór ,no Juventude tomak hamutuk ho família hosi vítima hodi hamriik halo asaun pasífiku hasoru Governu, liu-liu Komandu Jerál PNTL iha loron hirak tuir mai ne’e nia-laran,” Denis Saebaku afirma.
Jornalista : Arminda Fonseca
Editór : Francisco Simões
