iklan

COVID-19, HEADLINE, SAÚDE

Vasina efetivu, númeru pozitivu COVID-19 hahú menus

Vasina efetivu, númeru pozitivu COVID-19 hahú menus

Pesoál saúde fó vasina AstraZeneca inan-feton ida iha Sentru Saúde Bairro Formosa, Dili, sesta, (21/05). Imajen TATOLI/António Gonçalves

DILI, 07 juñu 2021 (TATOLI)–Diretór Sala Situasaun, Sentru Integradu Jestaun Krize (CIGC, sigla portugés), Brigadeiru Jenerál João Miranda ‘Aluk’, konsidera, implementasaun vasina iha Timor-Leste, lori efeitu pozitivu tanba númeru pozitivu COVID-19 hahú menus.

“Ita iha faze rua importante, ida mak buka asegura medida prevensaun COVID-19 no medida seluk atu aselera vasina, tanba haree hosi númeru efetivu COVID-19, hafoin vasina númeru pozitivu hahú tun, ida-ne’e hatudu katak efeitu hosi vasina ne’e iha,” Brigadeiru Jenerál Aluk hateten hafoin hasoru Primeiru-Ministru, Taur Matan Ruak, iha Rezidénsia Farol, segunda ne’e.

Tanba ne’e, Reprezentante CIGC ne’e apela ba populasaun ne’ebé seidauk simu vasina, atu hakbesik-an ba sentru vasina atubele simu maski la’ós obrigatóriu, maibé atu evita kontájiu vírus ne’e iha isin, vasina nu’udár dalan di’ak.

Notísia relevante: 11 juñu, hahú vasina doze daruak

Tuir dadus, to’o iha segunda (07/06), ema ho idade 18 ba leten hamutuk 100.000 iha territóriu tomak mak simu vasina tipu AstraZeneca doze dahuluk.

“Ne’e hatudu sinál di’ak ida, karik konsege vasina populasaun hamutuk um terço hosi númeru populasaun, bele dehan sente alegria oituan ona,” Aluk subliña.

Brigadeiru Jenerál ne’e haktuir, medida ne’ebé atu aselera lalais evita transmisaun vírus mak vasina, ne’ebé ho implementasaun vasina tuir meta hosi Governu, kada loron tenke vasina ema 5.000, maski la konsege realiza.

“La konsege implementa meta ne’e la’ós tanba laiha kondisaun, tanba kestaun rekursu umanu, ka stock vasina sufisiente, maibé númeru partisipasaun mak menus nune’e labele atinje meta ne’ebé define ona,” nia akresenta.

Notísia relevante: COVID-19: pozitivu 24, rekoperadu 194 no ativu 2.232

Entretantu, iha segunda ne’e CIGC rejista kazu pozitivu 24, rekuperadu 194 no kazu ativu 2.232, ne’ebé kazu hosi kazu foun 24, kompostu hosi Dili 20 no haat hosi munisípiu seluk.

Jornalista: Antónia Gusmão

Editora: Julia Chatarina  

iklan
iklan

Leave a Reply

iklan
error: Content is protected !!