DILI, 08 juñu 2021 (TATOLI) – Ministériu Ensinu Superiór, Siénsia no Kultura (MESSK) liuhosi ekipa Fundus Dezenvolvimentu Kapitál Umanu (FDCH) finaliza ona levantamentu dadus ba estudante Bolsa Hakbiit iha munisípiu 12, inklui RAEOA hamutuk 1.602.
Notísia Relevante : FDCH ho IESPP-sira asina MoU apoia bolsa hakbiit ba benefisiáriu 910
Diretora Ezekutivu FDCH, Leila Cárceres dos Santos, informa lista estudante atu asesu ba Bolsa Hakbiit hamutuk 1.602 presiza verifika fila-fali atu hetan númeru ida serteza ne’ebé atu asesu ba Instituisaun Ensinu Superiór Privadu (IESP).
Leila Cárceres dos Santos, tersa ne’e, ba jornalista-sira iha nia knar fatin iha Dili, informa dadus loloos estudante bolsa hakbiit atu asesu ba IESP ne’e iha de’it 910, kompostu hosi na’in-410 ba Institutu Ensinu Superiór Privadu no na’in-500 ba Institutu Ensinu Superiór Públiku, maibé dadus inskrisaun iha munisípiu-sira sa’e ba 1.602, tan ne’e, tenke verifika.
“Espera ekipa selesaun sei tur hamutuk iha semana ida ne’e atu kria regra ruma hodi bele tama ba prosesu selesaun,” nia hateten.
Nia esplika MESSK hamosu rejime Bolsa Hakbiit ne’e tanba hakarak fó oportunidade ba família kbiit-laek sira ne’ebé laiha rendimentu sustentável atu sira nia oan bele hola parte iha IESP-sira.
Leila Cárceres, informa sei iha mós formuláriu ba bolseiru-sira atu deklara katak sira mai hosi família kbiit-laek, nune’e karik iha futuru maka identifika deklarasaun bolseiru nian falsu, bolseiru ne’e tenke devolve osan ne’ebé Governu investe no sei kansela bolseiru nia kontratu.
Nia mós afirma katak bainhira parte rua (MESSK ho bolseiru Bolsa Hakbiit) selebra ona kontratu, ekipa FDCH sei verifika fali dadus bolseiru nian iha kada munisípiu hodi garante transparénsia ba públiku.
Jornalista : Tomé Amado
Editór : Francisco Simões
