BAUCAU, 08 juñu 2021 (TATOLI)—Autoridade postu admistrativu Baguia, António Ramos, deklara povu Baguia hein Governu sentrál realiza reabilitasaun estrada entre postu Laga bá Baguia, munisípiu Baucau, tanba ne’e autoridade lokál no abitante sira prontu kolabora atu nune’e bele aselera lalais prosesu.
“Ami rona, konkursu halo estrada permanente dirasaun postu administrativu Laga bá Baguia, ida seluk obra públika atu halo emerjénsia maibé to’o agora seidauk implementa, ne’ebé ita-nia komunidade sira sei hein,” Autoridade postu admistrativu Baguia, hateten ba Agência TATOLI, iha Sentru Konvensaun Baucau (CCB, sigla portugés), tersa ne’e.
Notísia relevante: Tinan ne’e, Governu loke konkursu públiku reabilita estrada Laga-Baguia
Tuir António Ramos, bainhira konklui reabilitasaun estrada, bele fasilita ona povu Baguia asesu produtu iha munisípiu no área rurál no sente hanesan iha sidade.
“Ami-nia rekomendasaun dahuluk mak hadi’a estrada, tanba ne’e bainhira realiza ona, maski ami iha foho maibé komunidade sente hanesan iha sidade,” nia akresenta.
Aleinde ne’e, kona-ba eletrisidade, suku 10 iha Baguai kuaze asesu ona, maski aldeia 11 mak seidauk hosi totál aldeia 47.
Notísia relevante: Hahú ohin, EDTL,E.P lansa konkursu instala eletrisidade pakote 30
Autoridade mós konsidera bee-moos importante ba komunidade, nune’e liuhosi Programa Nasionál Dezenvolvementu Suku (PNDS) konsege rezolve ona kestaun ne’e iha suku balun, maski iha suku balun seidauk asesu.
Daudaun ne’e, infraestrutura bázika hanesan estrada ho kondisaun grave no ponte ida a’at tanba inundasaun ne’ebé akontese iha abríl nia laran no rezulta mós sidadaun ida mak lakon vida.
Postu admistrativu Baguia rasik iha suku 10 hanesan Afalokai, Alaua karaik, Alaua leten, Defa-Uassi, Haekoni, Lalisura, Osso-Huna, Samalari no Uakala, ho totál populasaun hamutuk 14. 575.
Antes ne’e, konsultór Detile aprezenta ona esbosu dezeñu detalladu finál ba Ministériu Obra Públika (MOP), Diresaun Nasional Estrada, Ponte no Kontrolu Cheia (DNPCC, sigla Portugés), kona-ba reabilitasaun estrada postu admistrativu Laga-Baguia, munisípiu Baucau ho distánsia kilómetru 30 molok loke konkursu públiku iha tinan ne’e.
Jornalista: Natalino Belo
Editor: Julia Chatarina
