DILI, 08 juñu 2021 (TATOLI)–Embaixadór Estadu Unidu Amérika (EUA) iha Timor-Leste, Charles Kevin Blackstone, hasoru malu ho Primeiru-Ministru (PM), Taur Matan Ruak, hodi diskute kona-ba kooperasaun bilaterál iha área seguransa.
Asuntu importante ne’ebé mak entidade rua ne’e diskute maka progresu reabilitasaun aeroportu Baucau ne’ebé planeia ona iha tempu badak sei selebra akordu ida hodi inisia reabilitasaun.
Tuir Charles Kevin Blackstone, iha futuru aeroportu Baucau sei ajuda seguransa sira hodi halo kontrolu ba tasi evita peska ilegál.
“Reabilitasaun aeroportu la’ós de’it halo lutu haleu maibé mós sei hadi’a pista aviaun, hodi nune’e aviaun sei apoiu halo kontrolu ba área tasi Timór hodi evita peska ilegál. Ida-ne’e maka sei iha koordenasaun entre aviaun ho instituisaun relevante sira hanesan Unidade Polísia Marítima inklui Forsa Navál,” Diplomata ne’e dehan hafoin hasoru Xefe Governu iha Rezidénsia Farol, tersa ne’e.
Notísia relevante: Reabilitasaun Aeroportu Baucau Governu mak deside
Reprezentante EUA ne’e kontente tanba iha enkontru ne’e, PM reafirma fali ninia apoiu kooperasaun iha área seguransa.
“Ha’u fó hanoin filafali ba Primeiru-Ministru katak kooperasaun iha área seguransa entre nasaun rua importante no durante ne’e la’o di’ak. Hafoin diskusaun ha’u otimista tebes katak parte rua sei selebra akordu kona-ba reabilitasaun aeroportu Baucau iha tempu besik,” nia akresenta.
Iha tinan 2018, Timor-Leste hato’o pedidu ba EUA atu halo reabilitasaun ba pista aeroportu Baucau, ne’ebé EUA fó apoiu orsamentu hamutuk millaun $10 ba reabilitasaun.
Jornalista: Antónia Gusmão
Editora: Julia Chatarina
