DILI, 09 juñu 2021 (TATOLI) – Kopa Euro sai ona hanesan eventu jogu internasionál ne’ebé atrai bola-mania hotu nia atensaun iha mundu, inklui Timor-Leste.
Notísia Relevante : ETO+ hetan direitu eskluzivu halo transmisaun EURO 2021 iha TL
Bola-mania sira iha Timor-Leste, dezde fulan kotuk to’o mai ohin loron, halo preparativus oioin atu asiste jogu Euro ne’e liuhosi kanál televizaun no balun mós prepara ona atu asiste liuhosi plataforma live streaming bainhira iha espasu live streaming.
Iha Timor-Leste, úniku kompañia ETO+ maka iha direitu eskluzivu atu halo tranzmisaun direita ba jogu Euro 2021 ne’e liuhosi nia kanál rasik. Nune’e, la duvida bainhira bola-mania sira hahú ona sai konsumidór ETO+ hodi sosa sira-nia set box (receiver) ETO+ nian atu bele asiste jogu Euro 2021.
“Kopa Euro ita hatene katak kopa ida ne’ebé la’ós ita Timor-Leste de’it mak tau atensaun, maibé mundu tomak. Iha ita nia rain agora implementa hela serka sanitária no konfinamentu obrigatóriu, entaun ho jogu ne’e bele anima ita hadomi na’in futeból sira,” Adjuntu Sekretáriu Jerál Federasaun Futeból Timor-Leste (FFTL), Frederico Martins, hateten ba Agência Tatoli iha edifísiu FFTL, Dili, kuarta ne’e.
Nia fó sasin katak Kopa Euro ne’e fó ánimu ba ema hotu tanba kopa ne’e famozu tebes iha mundu no iha faze da-ruak hafoin kopa mundiál.
Joga Euro hanesan jogu ida ne’ebé kada tinan lima nasaun hotu iha kontinente Europa sei selebra ka hala’o jogu hodi buka se loos mak sei sai kampiaun.
Tuir oráriu ne’ebé fó sai ona katak jogu ne’e sei hahú iha 12 juñu to’o 11 jullu 202, tanba ne’e bola-mania iha Timor-Leste komesa hatudu ona sira-nia nasaun favoritu ne’ebé hola parte iha jogu ne’e. ezemplu, Portugál, España, Alemaña, Olanda , Fransa no sira-seluk tan.
Paul Soares hanesan timoroan ne’ebé fanátiku no gosta loos selesaun nasionál Portugal hatete, kopa Euro tinan ne’e Portugal mak sei nafatin sai kampiaun hodi hametin nia títulu.
“Ha’u ema ida ne’ebé uluk kedan gosta Portugál, ha’u gosta tanba sira nia jogu kapás no iha jogadór kualidade de’it. Mate ka moris Portugal,” Paul Soares hateten iha dada lia ho Agência Tatoli iha Dili.
Nia dehan, kada epoka jogu Euro komesa nia sempre taru hosi Portugal no 2016 bainhira Portugal sai hanesan ekipa kampiaun nia manán osan hamutuk $5.000-resin.
Hosi aspetu balun mós juventude balun, indivíduu no grupu komesa hamosu negósiu Toto Bola, hodi fa’an ba malu. Seluk fali, bala-mania balun mós buka malu ona hodi taru osan tuir ida-ida nia nasaun favoritu iha kopa Euro ne’e.
Nasaun sira ne’ebé partisipa iha kopa Euro ne’e hamutuk 24 hosi kontinente Europa hanesan;
Grupu A: Italia, Switzerland, Turkey Wales
Grupu B: Beljia, Denmark, Finland, Rusia
Grupu C: Netherland, Ukraine, Austria, North Macedonia
Grupu D: England, Croatia, Scotland, Ozech Republic
Grupu E: España, Sweden, Polandia, Slovakia
Grupu F : Hungary, Portugál, Fransa no Alemaña
Jornalista : Hortencio Sanchez
Editór : Francisco Simões
