DILI, 09 juñu 2021 (TATOLI)-–Governu liuhosi Ministériu Administrasaun Estatál (MAE) apela ba autoridade lokál sira atu mobiliza populasaun partisipa programa vasina nasionál kombate COVID-19, nune’e bele iha imunidade di’ak iha isin hasoru vírus.
“Ha’u hakarak apela ba xefe suku, aldeia no membru konsellu suku sira, atu mobiliza populasaun partisipa kampaña vasina iha Timór laran tomak,” Ministru Administrasaun Estatál , Miguel Pereira de Carvalho, hateten iha resintu Ministériu Finansa (MF), Aitarak-laran, kuarta ne’e.
Notísia relevante: PM husu autoridade lokál partilla importánsia vasina ba komunidade
Hahú loron 10 juñu, Governu sentrál lansa vasina doze daruak iha munisípiu hotu, tanba ne’e Ministru konsidera importante autoridade suku, aldeia inklui membru konsellu suku hamutuk 8.900, bele mobiliza komunidade sira hakbesik ba sentru vasinasaun hodi simu vasina.
“Ha’u husu autoridade lokál atu labele obriga komunidade sira, maibé uza meiu hodi konsella sira tanba vasina ne’e iha benefísiu di’ak liu kompara ho la vasina,” nia akresenta.
Atu fasilita atividade ne’e, Konsellu Ministru aprova ona projetu dekretu-lei kona-ba insentivu estraordináriu ba suku tanba haree ba akreximu esesionál serbisu.
Governu iha rekoñesimentu serbisu ne’ebé hala’o hosi suku sira, ba interese no benefísiu Estadu iha kontestu situasaun pandemia no dezastre naturál.
Notísia relevante: Governu aprova insentivu estraordináriu ba suku
“Ita fó intensiva finanseira ba líder komunitária, membru konsellu suku, lia-na’in inklui joven mane no feto sira, ho kuantidade orsamentu balun, ne’ebé sei halo pagamentu hahú juñu to’o setembru, nune’e sira bele mobiliza populasaun tuir programa vasina,” nia hatutan.
Nune’e, Ministru enkoraja mós ba Administradór Munisipál sira no Prezidente Autoridade Munisipál sira hotu inklui líder komunitáriu sira atu simu vasina tanba kategoria liña frente.
“Ami fó konsellu ba sira atu simu vasina uluk, atubele iha imunidade naton, tanba sira mak sei hasoru komunidade sira iha terrenu no enkoraja mós komunidade sira,” nia esplika.
Tuir governante ne’e, bainhira iha komunidade balun lakohi simu, parte MAE fó ona instrusaun ba líder komunitáriu sira hodi labele obriga, maibé esplika de’it benefísiu populasaun simu vasina.
Tuir dadus, to’o iha segunda (07/06), ema ho idade 18 ba leten hamutuk 100.00 iha territóriu tomak mak vasina tipu AstraZeneca doze dahuluk.
Jornalista: Florêncio Miranda Ximenes
Editora: Julia Chatarina
