VIQUEQUE, 09 juñu 2021 (TATOLI)– Komandante Polísia Nasionál Timor-Leste (PNTL) Munisípiu Viqueque, Superintendente Sebestião Alves Quintão, informa katak situasaun seguransa atuál iha Munisípiu Viqueque kontroladu no polísia seidauk rejistu kazu krime rtuma maka akontese iha área jurisdisaun Viqueque nian.
“Durante implementa estadu emerjénsia buat hotu la’o ho di’ak. Tanba saida mak ha’u dehan di’ak prinsípiu komandu ninia responsavel tau postu polísia entre fronteira Baucau no Viqueque no fatin sira seluk ne’ebé ita identifika hodi kontrola no asegura situasaun seguransa sira hotu,” Superintendente Sebestião Alves Quintão, informa ba Agência Tatoli iha Viqueque, tersa loraik (08/06).
Nia esplika maske kazu pozitivu COVID-19 iha Viqueque rejista, maibé parte seguransa la abandona servisu no komandu nafatin alerta ba membru polísia sira iha postu fronteira sira hodi kontrola viajen sidadaun ne’ebé tama-sai ba Munisípiu Viqueque tenke kumpre protokolu hodi aprezenta karta autorizasaun hosi Sentru Integradu Jestaun Krize (SIJK).
“Ami nafatin halo kontrolu ba movimentu sidadaun sira iha Munisípiu Viqueque,” Sebestião haktuir hodi informa mós katak komunidade Viqueque kooperativu tebes ho autoridade seguransa hodi hotu-hotu hola papél ba garante hakmatek no paz iha Viqueque laran.
Nia relata, dezafiu ne’ebé PNTL iha munisípiu Viqueque enfrenta mak transporte operasaun tanba karreta operasaun ne’ebé iha kuaze kondisaun aat.
“Bainhira ha’u mai asume kargu komandante iha Munisípiu Viqueque haree kondiasaun kareta aat, buat sira hotu ita presiza tempu hodi halo manutensaun no ami aprezenta ona proposta ba instituisaun relevante, fiar katak tempu badak bele halo manutensaun ba transporte,” nia hateten.
Solusaun ba dezafiu sira ne’e, nia hateten, PNTL nafatin hatudu ninia profisionalizmu maske hasoru limitasaun maibé la sai sasidik ba PNTL.
Jornalista : Vitorino Lopes da Costa
Editór : Francisco Simões
