Suku Uai-Mori hetan uma kbiit-laek tolu
VIQUEQUE, 09 juñu 2021 (TATOLI)– Suku Uai-Mori, Postu Administrativu Ossu, Munisípiu Viqueque hetan uma kbiit-laek tolu ne’ebé sei benefisia abitante kbiit-laek uma-kain tolu iha faze dahuluk ne’e.
Notísia Relevante : Suku Uai-mori seidauk asesu enerjia eletrisidade
Xefe Suku Uai-Mori, Francelino António Gomes, hateten sira-nia parte identifika ona abitante kbiit-laek uma-kain tolu ne’ebé sai benefisiáriu ba programa uma ba kbiit-laek ne’e.
“Ha’u kontente tanba Governu bele tau atensaun ba nia povu kbiit-laek iha área remotas,” Francelino António Gomes, haktuir ba Agência Tatoli iha Viqueque, tersa loraik (08/06).
Francelino hatutan, maneira identifika família kbiit-laek autoridade suku hamutuk ho ekipa Programa Nasionál Dezenvolvimentu Suku (PNDS) hodi halo levantamentu no survey direita iha terrenu hodi idéntika uma-kain ne’ebé kbiit-laek liu.
“Tanba husi verifika uma kain sira ne’e, iha uma kain tolu mak, merese hetan uma kbiit-laek,” Francelino hateten.
Nia dehan, benefisiáriu ba uma kbiit-laek hosi Suku Uai-Mori mak hanesan Bosi Leki, Amelia no Alcina Soares. Sira na’in-tolu nia uma antes ne’e kondisaun aat tanba taka ho tali no didin bambuu de’it.
Jornalista : Vitorino Lopes da Costa
Editór : Francisco Simões
